Да каманды Латушкі далучыўся экс-чыноўнік Савету бяспекі
Яўген Буры — адказны ў НАК за эканоміку і фінансы.
Эканаміст Яўген Буры далучыўся да Народнага антыкрызіснага кіравання, паведамляе тэлеграм-канал ініцыятывы. Раней ён працаваў у Міністэрстве па падатках і зборах Беларусі, а таксама ў Дзяржсакратарыяце Савета Бяспекі Рэспублікі.
У Яўгена Бурага дзве вышэйшыя адукацыі: эканамічная і юрыдычная. Ён скончыў Беларускі дзяржаўны эканамічны ўніверсітэт, а таксама Акадэмію кіравання. У дзяржаўным сакратарыяце Савета Бяспекі Рэспублікі Беларусь працаваў дарадцам па пытаннях эканамічнай бяспекі, членам і сакратаром Міжведамаснай камісіі па бяспецы ў эканамічнай сферы.
Мае кіраўнічы досвед працы ў сферы высокіх тэхналогій: у прыватнасці, у распрацоўцы і прасоўванні фінансавых IT-прадуктаў. Глыбока вывучаў пытанні прававога рэгулявання замежных інвестыцый, экспарту беларускай прадукцыі ў Расею, уплыву праблем экалогіі на стрымліванне эканамічнага росту.
Яўген — аўтар плана НАК па эканоміцы і фінансах па набліжэнні і паспяховаму праходжанню пераходнага перыяду.
