Дзяржсакратар ЗША: Мы выступаем на баку адважнага народа Беларусі
Злучаныя Штаты працягваюць падтрымліваць міжнародныя намаганні па незалежным расследаванні парушэнняў на выбарах у Беларусі, зневажання правоў чалавека падчас выбараў і рэпрэсій пасля іх. Пра гэта гаворыцца ў заяве дзяржсакратара ЗША Майка Пампеа, апублікаванай на сайце Дзяржаўнага дэпартамента.
„Мы выступаем на баку адважнага народа Беларусі і падтрымліваем яго права на свабодныя і справядлівыя выбары”, — падкрэсліў ён.
Пампеа заявіў, што ЗША прымаюць меры ў дачыненні да фізічных і юрыдычных асоб, замешаных у дзеяннях, накіраваных супраць дэмакратыі ў Беларусі. „У прыватнасці, Дзяржаўны дэпартамент і Міністэрства фінансаў ЗША ўжылі свае спецыяльныя паўнамоцтвы ў дачыненні да 40 чалавек і чатырох арганізацый, якія маюць дачыненне да выбарчых парушэнняў і зневажання правоў чалавека на фоне сфальсіфікаваных выбараў у Беларусі ў жніўні і жорсткімі рэпрэсіямі з боку ўладаў пасля іх”, — сказаў амерыканскі чыноўнік.
Ён таксама адзначыў, што ўпраўленне па кантролі за замежнымі актывамі (OFAC) Мінфіна ЗША ў адпаведнасці з прэзідэнцкім указам № 13405 наклала санкцыі на адну фізічную асобу і чатыры арганізацыі „за іх ролю ў фальсіфікацыі прэзідэнцкіх выбараў 9 жніўня і жорсткіх рэпрэсіях пасля іх”.
„Гэтыя фізічныя асобы і арганізацыі нясуць адказнасць або ўдзельнічалі ў дзеяннях або правядзенні палітыкі, накіраванай супраць дэмакратычных працэсаў або інстытутаў у Беларусі. На сёння OFAC наклала санкцыі на 25 беларускіх фізічных асоб і 13 арганізацый у рамках указа № 13405”, — паведаміў Пампеа.
Акрамя таго, паводле яго слоў, Дзярждэп у адпаведнасці з Пракламацыяй прэзідэнта № 8015 „прыняў меры па выяўленні 39 асоб, адказных за дзеянні, накіраваныя супраць дэмакратыі ў Беларусі, і ўвёў у дачыненні да іх візавыя абмежаванні”.
„На сёння Дзяржаўны дэпартамент ЗША наклаў візавыя абмежаванні ў адпаведнасці з Пракламацыяй прэзідэнта № 8015 у дачыненні да 63 чалавек — за ўдзел у дзеяннях супраць дэмакратыі ў Беларусі, фальсіфікацыі прэзідэнцкіх выбараў 9 жніўня і жорсткіх рэпрэсіях пасля іх, якія працягваюцца па сённяшні дзень”, — заявіў дзяржсакратар ЗША.
23 снежня OFAC наклаў санкцыі на намесніка міністра ўнутраных спраў Беларусі Генадзя Казакевіча, Цэнтрвыбаркам, АМАП ГУУС Мінгарвыканкама і ГУУС у цэлым, а таксама на падраздзяленне „Альфа” Камітэта дзяржбяспекі.
2 кастрычніка Злучаныя Штаты ўвялі санкцыі супраць васьмі беларускіх афіцыйных асоб — членаў Цэнтрвыбаркама і шэрагу сілавікоў. Пад санкцыі трапілі намеснік старшыні Цэнтрвыбаркама Беларусі Вадзім Іпатаў, сакратар ЦВК Алена Дмухайла, кіраўнік МУС Юрый Караеў (цяпер памочнік прэзідэнта па Гродзенскай вобласці), яго намеснік і камандуючы ўнутранымі войскамі Юрый Назаранка (цяпер першы намеснік міністра ўнутраных спраў), а таксама намеснік міністра Аляксандр Барсукоў (цяпер памочнік прэзідэнта па Мінску) і намеснік камандуючага ўнутранымі войскамі Хазалбек Атабекаў. Акрамя гэтага, у спісе значацца кіраўнік мінскага АМАП Дзмітрый Балаба і начальнік ГУУС Мінгарвыканкама Іван Кубракоў (цяпер кіраўнік МУС).
22 снежня Верхняя палата Кангрэса ЗША (Сенат) ухваліла законапраект „Аб суверэнітэце, правах чалавека і дэмакратыі ў Беларусі”. На падставе гэтага дакумента прэзідэнт ЗША зможа ўвесці персанальныя візавыя санкцыі супраць членаў Цэнтрвыбаркама і „ўдзельнікаў маніпуляцый на выбарах”, у дачыненні да кожнай „урадавай асобы, адказнай за пераслед незалежных СМІ”, а таксама любога датычнага да парушэнняў правоў чалавека і рэпрэсій. Пры гэтым у тлумачэнні да законапраекта ўдакладняецца, што падобныя меры могуць закрануць грамадзян любой дзяржавы, у тым ліку Расіі.
Фота: Jeff Chiu / AP
