Эксперты ААН: Улады Беларусі павінны спыніць рэпрэсіі
Група экспертаў ААН выказала сур’ёзную занепакоенасць у сувязі з узмацненнем рэпрэсій супраць грамадзянскай супольнасці ў Беларусі, заявіўшы, што ўлады краіны павінны абараняць права на свабоду выказвання меркавання і спыніць душыць крытыку, паведамляе Упраўленне вярхоўнага камісара ААН па правах чалавека.
Як адзначаецца ў заяве экспертаў ад 5 чэрвеня, у траўні не менш за 195 чалавек — праваабаронцы, журналісты, блогеры, медыцынскія работнікі і іншыя прадстаўнікі грамадзянскай супольнасці — былі арыштаваныя за тое, што яны выказалі свае погляды, або за ўдзел у мірных акцыях пратэсту і пікетах для збору подпісаў і вылучэння кандыдатаў на прэзідэнцкія выбары, прызначаныя на 9 жніўня.
„Мы сур’ёзна занепакоеныя тым, што гэтыя арышты, звязаныя з ажыццяўленнем свабоды мірных сходаў і свабоды меркаванняў і іх выказвання, аказваюць негатыўнае ўздзеянне на грамадзянскую супольнасць, незалежную прэсу і бесперашкоднае выказванне асаблівай думкі”, — падкрэсліла спецыяльны дакладчык ААН па пытанні аб становішчы ў галіне правоў чалавека ў Беларусі Анаіс Марын.
Большасць інцыдэнтаў адбылася пасля затрымання 6 траўня вядомага блогера Сяргея Ціханоўскага. Яго арышт выклікаў пратэсты па ўсёй краіне, падчас якіх дэманстранты патрабавалі яго вызвалення, канстатуюць эксперты ААН. Знаходзячыся ў зняволенні, Ціханоўскі абвясціў аб сваім намеры балатавацца ў прэзідэнты. Аднак яго рэгістрацыя была адхіленая, і гэта рашэнне выклікала новыя пратэсты ў некалькіх беларускіх гарадах, асабліва ў Гародні, дзе ён быў пасля паўторна арыштаваны 29 траўня.
„Да цяперашняга часу прынамсі 72 чалавекі былі аштрафаваныя і 69 чалавек былі арыштаваныя на тэрмін да 15 сутак пазбаўлення волі па абвінавачанні ў парушэнні парадку правядзення масавых мерапрыемстваў”, — канстатуюць у ААН.
„Мы занепакоеныя тым, што абвінавачанні могуць быць выкарыстаныя ў якасці інструмента, каб задушыць крытычныя галасы апазіцыйных кандыдатаў, праваабаронцаў, журналістаў, блогераў і іншых прадстаўнікоў грамадзянскай супольнасці, уключаючы медыцынскіх работнікаў. Асабліва сур’ёзнае абмежаванне права на свабоду выказвання меркаванняў напярэдадні выбараў”, — заявіла Марын.
Заўвагі спецдакладчыка па пытанні аб становішчы ў галіне правоў чалавека ў Беларусі былі падтрыманы спецыяльным дакладчыкам па пытанні аб правах на свабоду мірных сходаў і асацыяцыі, спецыяльным дакладчыкам па пытанні аб становішчы праваабаронцаў, спецыяльным дакладчыкам па пытанні аб заахвочванні і абароне права на свабоду меркаванняў і іх свабоднае выказванне, спецыяльным дакладчыкам па пытанні аб праве кожнага чалавека на найвышэйшы дасягальны ўзровень фізічнага і псіхічнага здароўя і спецыяльным дакладчыкам па пытанні аб незалежнасці суддзяў і адвакатаў.
„За два месяцы да прэзідэнцкіх выбараў мы настойліва заклікаем урад спыніць практыку падаўлення галасоў прадстаўнікоў грамадзянскай супольнасці і забяспечыць плюралістычнае асяроддзе, у якім усе людзі могуць бяспечна і свабодна ажыццяўляць сваё права на пошук і распаўсюджванне інфармацыі, свае правы на свабоду выказвання меркаванняў, мірных сходаў і асацыяцый”, — заявіла Марын.
Спецыяльныя дакладчыкі з’яўляюцца часткай так званых спецыяльных працэдур Савета па правах чалавека. Гэта міжнародны праваабарончы орган у сістэме ААН, які замяніў Камісію па правах чалавека. Спецыяльныя працэдуры (найбуйнейшы орган незалежных экспертаў у сістэме абароны правоў чалавека ААН) — гэта агульная назва незалежных механізмаў савета для ўстанаўлення фактаў і маніторынгу.
belapan.by
