Еўракамісар Хан пракаментаваў рашэнне Лукашэнкі не ехаць на саміт
Няма ніякіх негатыўных пачуццяў ад таго, што ад Беларусі ў саміце Усходняга партнёрства (УП) будзе ўдзельнічаць не прэзідэнт, заявіў камісар па еўрапейскай палітыцы суседства і перамовам аб пашырэнні ЕЗ Ёханес Хан 23 лістапада ў Бруселі на сустрэчы з журналістамі з краін УП (Азербайджан, Арменія, Беларусь, Грузія, Малдова і Украіна).
„Краіна вольная вырашаць, хто і на якім узроўні яе прадставіць. Краіну запрашаюць, натуральна, на самым высокім узроўні, — сказаў Хан. — Наколькі я разумею, у іншых краінах з прычыны канстытуцыйных умоў або абмежаванняў альбо прэзідэнт, альбо прэм’ер-міністр з’яўляюцца найвышэйшымі прадстаўнікамі дзяржавы ў той ці іншай замежнай паездцы. Беларусь прыняла рашэнне накіраваць міністра замежных спраў. У нас з ім добрыя адносіны, мы сустракаліся некалькі разоў. Няма ніякіх негатыўных пачуццяў або стаўлення да таго, што не прыязджае прэзідэнт”.
Паводле слоў еўракамісара, адносіны паміж ЕЗ і Беларуссю паляпшаюцца. „Калі я раніцай прачынаюся, я не бягу адразу да карты і не спрабую ткнуць пальцам у краіну, якая яшчэ не з’яўляецца членам ЕЗ, і потым адразу не тэлефаную ім з прапановай далучыцца. Мы актыўна не прасоўваем гэтую ідэю, але мы хочам умацоўваць сувязі з нашымі суседзямі. Мы спрабуем знайсці пункты сутыкнення”, — сказаў Хан.
Ён адзначыў, што ў Беларусі ёсць свае інтарэсы ў дачыненні да інтэнсіўнасці ўзаемадзеяння з ЕЗ.
„Мы сваю пазіцыю карэктуем з улікам гэтых інтарэсаў, — падкрэсліў Хан. — Пагадненне з Беларуссю — гэта не нейкі кантракт з жорсткімі абавязацельствамі, але, тым не менш, ён дае аснову для вырашэння пэўных пытанняў”.
Паводле яго слоў, „ёсць пытанні, якія выклікаюць заклапочанасць”. „Напрыклад, у Беларусі прымяняецца смяротнае пакаранне і парушаюцца правы чалавека. Але мы назіраем адзінае палітычнае жаданне з абодвух бакоў працаваць у гэтым кірунку. Мы таксама не жадаем выстаўляць празмерныя патрабаванні да краіны. Мы імкнемся да пошуку ўзаемапрымальных рашэнняў”, — дадаў еўракамісар.
Пытанне аб тым, хто ўзначаліць беларускую дэлегацыю на шостым саміце УП, заставалася адкрытым да 21 лістапада. Упершыню за ўвесь час правядзення гэтых мерапрыемстваў на саміт быў запрошаны прэзідэнт Беларусі. На пяці папярэдніх самітах Беларусь прадстаўлялі чыноўнікі рознага ўзроўню, бо дзейнічала забарона на ўезд Аляксандра Лукашэнкі ў краіны Еўрасаюза, але ў лютым 2016 года забарона была знятая. 21 лістапада МЗС Беларусі паведаміў, што беларускую дэлегацыю на саміце ў Бруселі ўзначаліць міністр замежных спраў Уладзімір Макей.
Глядзіце таксама
