Еўракамісія дала старт санкцыям супраць Польшчы
Еўрапейская камісія пачала ў сераду, 20 снежня, працэдуру санкцый супраць Польшчы з-за ўвядзення скандальнай судовай рэформы.
Пра гэта заявіў віцэ-прэзідэнт Еўракамісіі Франс Цімерманс на прэс-канферэнцыі ў Бруселі.
«Сёння канстытуцыйнасць судаводства ў Польшчы не можа быць гарантаваная. 40% суддзяў Вярхоўнага суда будуць вымушаныя сысці ў адстаўку праз закон, прыняты польскім парламентам на мінулым тыдні. А новыя суддзі будуць прызначаныя прэзідэнтам па рэкамендацыі Нацыянальнага савета судаводства, у якім дамінуюць прадстаўнікі кіруючай партыі », – сказаў Цімерманс.
Паводле яго слоў, Еўракамісія выпусціла тры рэкамендацыі на працягу двух гадоў, але яны не былі прынятыя да ўвагі. Еўрапейскія чыноўнікі таксама правялі 25 сустрэч з прадстаўнікамі Польшчы, але вынікаў яны не прынеслі.
«Камісія вымушана канстатаваць, што зараз у Польшчы існуе сур’ёзная рызыка парушэння вяршэнства права», – сказаў Цімерманс.
Нагадаем, 15 лістапада Еўрапарламент прыняў крытычную рэзалюцыю па Польшчы, якая рэкамендуе запусціць працэдуру прымянення санкцый супраць краіны.
У польскім урадзе былі перакананыя, што ЕЗ не накладзе санкцыі на іх краіну.
Глядзіце таксама
