Еўракамісія хоча ўзгодненага змякчэння каранціну
Еўракамісія хоча ўзгодненага змякчэння каранціну, каб не справакаваць другой хвалі COVID-19. Краіны-удзельніцы Еўразвязу павінны каардынаваць меры па змякчэнні каранціну, каб прадэманстраваць зладжаны падыход да барацьбы з пандэміяй COVID-19. Пра гэта паведамляе The Financial Times.
Афіцыйна тэкст дарожнай мапы па змякчэнні каранціну мае з’явіцца на гэтым тыдні. Кіраўніца Еўракамісіі Урсула фон дэр Ляйен незадаволеная тым, як няўзгоднена дзейнічалі нацыянальныя ўрады, зачыняючы межы. Гэта, у прыватнасці, прывяло да чэргаў і праблем з перапраўкай медыкаментаў.
Цяпер нацыянальным урадам накіраваны чарнавік дарожнай мапы. У ім пазначана, што па меры змякчэння каранціну – рост заражэнняў каронавірусам непазбежны. Адпаведна, перад тым, як здымаць абмежаванні на працу кампаній і грамадскіх устаноў, краіны павінны пераканацца, што іх сістэмы аховы здароўя змогуць дапамагчы хворым.
Беларускае Радыё Рацыя
