Еўрапарламент падаў у гаагскі суд заяву на акупацыю Крыма
Еўрапарламент афіцыйна падаў у Міжнародны крымінальны суд у Гаазе заяву, якая ініцыюе расследаванне расейскай акупацыі Крыма, а таксама частак Луганскай і Данецкай абласцей.
Больш падрабязна – наш украінскі карэспандэнт Марцін Война.
– Сам факт падачы заявы ў Міжнародны трыбунал не азначае, што такая заява будзе разгледжаная аўтаматычна і што судовыя паседжанні распачнуцца ў хуткім часе. Але юрыдычныя дзеі Еўрапарламента сведчыць, што ў Страсбургу больш не трактуюць падзеі ў зоне Антытэрарыстычнай аперацыі як “грамадзянскую вайну”.
Украінскі міністр юстыцыі Павел Пятрэнка паведаміў, што ініцыятыва еўрадэпутатаў мае для ўкраінскіх грамадзянаў і практычны бок. “Цяпер нашыя грамадзяне змогуць праз суд патрабаваць ад Расеі кампенсацыі за страту маёмасці, катаванні, іншыя парушэнні правоў чалавека”, – мяркуе міністр.
На думку высокапасадоўца, перададзеных у Гаагу доказаў дастаткова, каб пачаць супраць расейскіх уладаў крымінальныя справы. У першую чаргу, мяркуе Пятрэнка, да крымінальнай адказнасці неабходна прыцягнуць прэзідэнта Расеі Уладзіміра Пуціна і ягоных бліжэйшых паплечнікаў.
Марцін Война, Беларускае Радыё Рацыя, Украіна
Глядзіце таксама
