Еўразвяз можа палепшыць стасункі з Беларуссю
Еўразвяз бачыць магчымасць палепшыць адносіны з Беларуссю пасля многіх гадоў праблемаў у стасунках, заявіў міністр замежных спраў Латвіі Эдгарс Рынкевічс пасля нарады кіраўнікоў МЗС краін Еўразвязу ў Рызе.
У сувязі з наяўнасцю палітвязняў, адсутнасцю свабодных выбараў і парушэннямі правоў чалавека, Еўразвяз захоўвае спіс неўязных беларускіх чыноўнікаў і бізнесоўцаў, блізкіх да ўлады.
На думку палітолага Алеся Лагвінца, больш шчыльныя кантакты афіцыйнага Менска з Бруселем не паўплываюць на агульную сітуацыю ў Беларусі:
– Па выступах Лукашэнкі бачна, што ён не збіраецца праводзіць празрыстыя выбары. І тое, што прырода рэжыму ў Беларусі памяняецца ад шчыльных сувязяў з ЕЗ, у мяне выклікае сумнеў. Аднак ад больш шчыльнага кантакту можа памяняцца свядомасць большасці беларусаў.
Не выключана, што ўпершыню беларускую дэлегацыю на саміце “Усходняга партнёрства” ў Рызе ачоліць кіраўнік Беларусі .
Рынкевічс заявіў, што ўдзел Лукашэнкі ў саміце ў Рызе — адкрытае пытанне. «Запрашэнняў яшчэ нікому не дасылалі. Гэта адбудзецца толькі напрыканцы сакавіка — пачатку красавіка”.
Валянціна Лаеўская, Беларускае Радыё Рацыя
Фота ru.tsn.ua
Глядзіце таксама
