G7 заклікала ўлады Беларусі правесці новыя выбары пад міжнародным назіраннем
Краіны G7 (Вялікай сямёркі), куды ўваходзяць ЗША, Вялікабрытанія, Італія, Канада, Францыя, Японія, Германія, заклікаюць правесці новыя прэзідэнцкія выбары пад міжнародным назіраннем і вызваліць усіх палітвязняў.
У выніковым камюніке «Вялікай сямёркі», прынятым на сустрэчы кіраўнікоў МЗС дзяржаваў G7 у Лондане, гаворыцца, што краіны G7:
– заклапочныя палітычным крызісам у Беларусі у выніку сфальшаваных выбараў у жніўні 2020 года;
– заклікаюць рэжым выканаць рэкамендацыі Маскоўскага Механізму АБСЕ;
– заклікаюць рэжым вызваліць усіх палітвязняў;
– заклікаюць рэжым спыніць усе рэпрэсіі, у тым ліку супраць журналістаў і праваабаронцаў, забяспечыць права на сходы і выказванне;
– заклікаюць рэжым уступіць у сапраўдны дыялог з грамадствам і сапраўднымі лідарамі дэмакратычных сілаў і грамадзянскай супольнасці;
– заклікаюць рэжым прыняць прапанову АБСЕ стаць медыятарам у дыялогу, каб вырашыць крызіс;
– заклікаюць правесці новыя свабодныя і дэмакратычныя выбары пад міжнародным назіраннем;
– падтрымліваюць памкненні беларускага народу да дэмакратыі і прыцягнення да адказнасці вінаватых у парушэннях правоў чалавека.
G7 таксама занепакоеная „захаваннем негатыўнай мадэлі безадказных і дэстабілізуючых паводзін Расеі”.
Беларускае Радыё Рацыя
