Ірына Леўшына: БелаПАН зараз перажывае самы складаны перыяд
У БелаПАН зараз самы складаны перыяд, пра гэта кажа галоўная рэдактарка першага беларускага прыватнага агенцтва навінаў, заснаванага 19 лістапада 1991 года, Ірына Леўшына.
Прычынай таму – раптоўны скон стваральніка кампаніі Алеся Ліпая і так званая “справа БелТА”.
– Раней былі перыяды безграшоўя, перыяд, калі БелаПАН фармаваўся. Але, па-першае, быў Алесь – душа кампаніі. Атмасфера была ў краіне іншая. Тады ўсё было прасцей. Па-другое, гэтая крымінальная справа, якая вісіць над намі як дамоклаў меч. І зразумела, што яно рассыпаецца, але чымсьці яно ўсё роўна закончыцца.
РР: Ці стала больш зразумелай нагода атакі на БелаПАН і TUT.BY?
Ірына Леўшына: Я пра гэта сказала адразу – для таго, каб запалохаць недзяржаўныя СМІ. Гэта выключна палітычная справа. Гэта ціск на журналістаў. Што стала спускавым кручком, я не ведаю. Мы можам толькі здагадвацца. Хто гэта ініцыяваў, мы таксама можам толькі здагадвацца. Я думаю, што гэта на роўні дзяржаўных ідэолагаў. Гэта не сілавікі, сілавікі сталі выканаўцамі.
РР: Многія казалі, што гэта перад нейкімі важнымі падзеямі. Але важных падзей пакуль што не было.
Ірына Леўшына: Так, але я думаю, што ўсе найперш маюць на ўвазе выбары – прэзідэнцкія і парламенцкія. І менавіта за апошнія гады ўлада відавочна страчвае кантроль над грамадствам. І дзяржаўным СМІ мала хто верыць. Запалохаць незалежныя СМІ напярэдадні выбарчых кампаній вельмі важна. І мне падаецца, што ціск будзе ўзмацняцца. Не ведаю, якім чынам. Ды нават на прафесійным роўні. Нас працягваюць не акрэдытоўваць на мерапрыемствы з удзелам кіраўніка дзяржавы.
РР: Ці карыстаецеся вы зараз інфармацыяй БелТА?
Ірына Леўшына: НЕ. І гэта ўжо справа прынцыпа.
Як вядома, Ірыну Леўшыну і міжнародную аглядальніцу БелаПАН Таццяну Каравянкову абвінавачваюць у незаконным выкарыстанні інфармацыі дзяржаўнага агенцтва навінаў БелТА.
Цалкам матэрыял у далучаным гукавым файле:
Гутарыў Стас Дадэрка, Беларускае Радыё Рацыя
Фота: БелаПАН
