Кіеў: РФ размясціла на мяжы з Украінай і ў Крыме звыш 80 000 вайскоўцаў
Расея размясціла на мяжы з Украінай больш за 40 тысяч вайскоўцаў і яшчэ столькі ж — у Крыме. Пра гэта паведаміла прадстаўніца ўкраінскага прэзідэнта Юлія Мендэль у інтэрв’ю інфармагенцтву Reuters у панядзелак, 12 красавіка.
Расейская вайсковая тэхніка, красавік 2021 года
Яна адзначыла, што ўкраінскі прэзідэнт Уладзімір Зяленскі накіраваў запыт на перамовы са сваім расейскім калегам Уладзімірам Пуціным, але да гэтага часу не атрымаў адказу. „Мы вельмі спадзяемся, што гэта не азначае адмову ад дыялогу”, — працягнула Мендэль.
У інтэрв’ю „Інтэрфакс-Украіна” яна патлумачыла, што запыт быў накіраваны 26 сакавіка, адразу пасля гібелі чацвярых ваеннаслужачых Узброеных сіл Украіны ў выніку абстрэлу ў раёне пасёлка Шумы Данецкай вобласці. Між тым прэс-сакратар Пуціна Дзмітрый Пяскоў паведаміў, што „за апошнія дні” не было „ніякіх запытаў” на перамовы Зяленскага з Пуціным.
МЗС Украіны заклікае РФ адвесці войскі
МЗС Украіны абвінаваціла Расею ў невыкананні Венскага дакумента аб мерах умацавання даверу і бяспекі, які Арганізацыя па бяспецы і супрацы ў Еўропе (АБСЕ) прыняла ў 2011 годзе. У адпаведнасці з прадугледжанай гэтым дакументам працэдурай, Маскве быў накіраваны запыт аб „прадастаўленні тлумачэнняў адносна істотнага росту ваеннай прысутнасці РФ уздоўж мяжы з Украінай і на часова акупаваных тэрыторыях Украіны на працягу апошніх дзён”, але расейскі бок „адмовіўся прадастаўляць субстантыўную інфармацыю (… ), заявіўшы, што не вядзе такой дзейнасці „, гаворыцца ў заяве МЗС.
Ведамства сцвярджае, што Масква таксама праігнаравала „далейшыя спробы” прыцягнуць яе да кансультацый, „накіраваных на зніжэнне напружання”, і „байкатавала” сустрэчу з удзелам іншых краін — членаў АБСЕ, скліканую Украінай 10 красавіка. МЗС у Кіеве заклікала РФ адвесці войскі ад мяжы з Украінай, „спыніць ваяўнічую рыторыку”, распаўсюджванне дэзінфармацыі і пачаць сумленна выконваць Менскія пагадненні і абавязацельствы па Венскім дакуменце АБСЕ.
РФ сцягвае сілы да ўкраінскай мяжы
У пачатку красавіка з’явіліся паведамленні пра тое, што Масква сцягвае войскі да мяжы з Украінай. Канцэнтрацыю войскаў на расейска-ўкраінскай мяжы, а таксама ў анексаваным Крыме кіраўнік Мінабароны РФ Сяргей Шойгу афіцыйна патлумачыў „кантрольнымі праверкамі”.
ЕЗ і ЗША да гэтага не аднойчы заяўлялі пра ўсебаковую падтрымку Кіева. 6 красавіка ў тэлефоннай размове з прэзідэнтам Украіны генеральны сакратар НАТА Енс Столтэнберг запэўніў яго ў „цвёрдай падтрымцы” альянсам суверэнітэту і тэрытарыяльнай цэласнасці Украіны. Канцлер Германіі Ангела Меркель у тэлефоннай размове з прэзідэнтам РФ заклікала яго спыніць нарошчванне войскаў на мяжы з Украінай.
Глядзіце таксама
