КНДР перамагла ЗША ў фоташопе
Некалькі бамбавікоў B-1В і знішчальнікаў F-15 ВПС ЗША, а таксама амерыканскі атамны авіяносец Карл Вінсан былі паказальна знішчаны арміяй Паўночнай Карэі. Праўда, адбылося гэта ў фоташопе, малюнкі, створаныя ў якім, былі змантаваныя ў відэа, апублікаванае на адзіным паўночнакарэйскім сайце DPRK Today.
Прапагандысцкае відэа, створанае ў КНДР, трапіла на YouTube. Яно пачынаецца з кадраў, дзе прэзідэнт ЗША Дональд Трамп выступае перад вайскоўцамі на амерыканскай авіябазе Эндрус, прычым фота цяперашняга гаспадара Белага дома суправаджаецца тытрамі са словам „вар’ят” на карэйскай мове.
Далей у відэа выкарыстаны рэальныя кадры, знятыя падчас выпрабаванняў паўночнакарэйскіх ракет розных класаў. А далей пачынаецца мантаж не лепшай якасці: яны трапляюць у амерыканскія знішчальнікі і бамбавікі. Затым паўночнакарэйская падводная лодка знішчае амерыканскі авіяносец „Карл Вінсан”. Усё гэта адбываецца пад музыку ў выкананні жаночага вакальна-інструментальнага ансамбля „Моранбонг”.
