Крэмль: Асобнай сустрэчы Пуціна з Лукашэнкам у Сочы пакуль не плануецца
Прэзідэнт Расеі Уладзімір Пуцін 10-12 кастрычніка ў Сочы правядзе некалькі двухбаковых сустрэч з калегамі з СНД. Асобных перамоў з Аляксандрам Лукашэнкам пакуль не запланавана, але яны не выключаны, паведаміў журналістам памочнік прэзідэнта Расеі Юрый Ушакоў.
„10 кастрычніка адбудуцца дзве сустрэчы Уладзіміра Пуціна: першая — з прэзідэнтам Рэспублікі Таджыкістан Эмамалі Рахмонам, другая — з прэзідэнтам Рэспублікі Малдова Ігарам Дадонам”, — цытуе прадстаўніка Крамля ТАСС.
Паводле яго слоў, „11 кастрычніка перад пачаткам усіх пасяджэнняў [саміту СНД і ЕўрАзЭС] адбудзецца сустрэча з прэзідэнтам Рэспублікі Узбекістан Шаўкатам Мірзіеевым, 12 кастрычніка адбудзецца сустрэча з прэзідэнтам Казахстана Нурсултанам Назарбаевым”. „Не выключана і правядзенне іншых сустрэч, але я паведаміў пра тыя, якія ўзгоднены і па якіх ужо выдзелены часавыя параметры ў раскладзе нашага прэзідэнта”, — патлумачыў Ушакоў.
„Пакуль асобнай сустрэчы [з Лукашэнкам] не плануецца, хоць я, натуральна, не выключаю нейкага кантакту на нагах па тых ці іншых пытаннях, а можа быць, яна [асобная сустрэча] і будзе ўзгоднена па ходу”, — дадаў ён. Прадстаўнік Крамля нагадаў, што расійскі і беларускі лідары размаўлялі па тэлефоне ў суботу і Лукашэнка пацвердзіў свой удзел у самітах.
Як паведамляў БелаПАН, у ходзе тэлефоннай размовы 7 кастрычніка Лукашэнка пацвердзіў Пуціну свой удзел у сочынскіх самітах кіраўнікоў дзяржаў СНД і ЕўрАзЭС і падкрэсліў, што высокі ўзровень каардынацыі паміж Беларуссю і Расеяй часта становіцца вырашальным фактарам і прадвызначае ў канчатковым выніку прыняцце канцэптуальных рашэнняў па развіцці інтэграцыі.
Лукашэнка і Пуцін абмеркавалі „актуальны стан беларуска-расейскага супрацоўніцтва і тэндэнцыі ў гэтай сферы”. Акрамя таго, яны закранулі тэму падрыхтоўкі да правядзення сесіі Савета калектыўнай бяспекі АДКБ у Менску, якая прызначана на 30 лістапада.
belta.by
