Леў Марголін: Крэмль можа націснуць на беларускія ўлады…
Афіцыйны Менск паабяцаў Украіне дапамагчы нафтапрадуктамі, што выклікала нервовую рэакцыю ў Маскве. Эканаміст Леў Марголін адзначае, што “на такі крок беларускія улады ідуць з-за цяжкага эканамічнага становішча”.
Беларускія ўлады паабяцалі Кіеву дапамагчы нафтапрадуктамі. Трэба адзначыць, што больш паловы імпарта нафтапрадуктаў Украіны прыпадае на пастаўкі менавіта з Беларусі.
У сваю чаргу сябра камітэта Дзярждумы Расеі па справах СНД і еўразійскай інтэграцыі Раман Худзякоў прапанаваў прыпыніць пастаўкі нафты ў Беларусь.
Леў Марголін: У абяцаннях Менска Кіеву трэба менш шукаць палітыкі і больш глядзець на эканамічныя чыннікі, бо нафтапрадукты – гэта асноўны прадмет беларускага экспарту ва Украіну. Таму любая магчымасць павялічыць яго ці захаваць у старых аб’ёмах – вельмі важная справа для беларускага бюджэту. А, калі ўлічваць, што ўлады збіраюцца падняць падатак на дабаўленую вартасць, можна зрабіць выснову, што эканамічная сітуацыя дастаткова складаная. Пра гэта сведчаць і тыя меры, якія накіраваны на абмежаванні імпарту. Адным словам, заявы наконт дапамогі нафтапрадуктамі – цалкам эканамічнае рашэнне, якое, натуральна, не падабаецца Расеі. Крэмль насамрэч можа прапанаваць нейкія санкцыі ў адносінах да Беларусі ці націснуць на беларускія ўлады іншых шляхам, каб тыя адмовіліся ад такіх паставак.
РР: А можа гэта такая прыхаваная просьба да Расеі даць яшчэ грошай?
Леў Марголін: Так. Калі Расея будзе ціснуць, то адказ напэўна ж будзе такім: маўляў, калі вы не хочаце, каб мы давалі нафтапрадукты Украіне, то дайце яшчэ больш грошай нам.
РР: Альбо адмяніце нафтавую мыту…
Леў Марголін: Гэта таксама варыянт, бо яе, па некаторай інфармацыі, толькі з будучага года плануюць зменшыць удвая. Хоць такі расклад, безумоўна, б’е па расейскаму бюджэту.
Кастусь Заблоцкі, Беларускае Радыё Рацыя
Глядзіце таксама
