Літва скардзіцца ў МАГАТЭ на Беларусь
Міністр энергетыкі Літвы Жыгімантас Вайчунас звярнуўся ў Міжнароднае агенцтва па атамнай энергетыцы (МАГАТЭ) з нагоды развіцця сітуацыі на Беларускай атамнай электрастанцыі. Ядзернае паліва дастаўлена на пляцоўку будаўніцтва АЭС у Астраўцы на мінулым тыдні, нягледзячы на тое, што пагадненне з Літвой аб датэрміновым апавяшчэнні аб ядзернай аварыі яшчэ не падпісана.
Цытата: «Мы былі праінфармаваныя МАГАТЭ аб тым, што ядзернае паліва для першага блоку Астравецкай АЭС ужо дастаўлена. Аднак Беларусі яшчэ трэба падпісаць двухбаковае пагадненне аб раннім апавяшчэнні аб ядзернай аварыі. Такая сітуацыя недапушчальная, і гэта недапушчальная практыка, паколькі гаворка ідзе пра бяспеку краін і народаў».
Літва занепакоена тым, што справаздачы аб місіях МАГАТЭ, праведзеных у жніўні 2019 года і лютым 2020, да гэтага часу не апублікаваныя. Міністр энергетыкі Літвы таксама занепакоены тым, што Беларусь не выканала рэкамендацыі, дадзеныя міжнароднымі экспертамі ў ходзе стрэс-тэстаў па забеспячэнні ядзернай бяспекі АЭС, якія павінны быць выкананы да ўводу БелАЭС у эксплуатацыю.
Беларускае Радыё Рацыя
Глядзіце таксама
