Лукашэнка: Новая рэдакцыя дэкрэта №3 павінна быць прыземленай
Пра гэта заявіў кіраўнік краіны 21 снежня на нарадзе аб праектах прававых актаў, накіраваных на развіццё рэальнага сектара эканомікі, навуковай дзейнасці і забеспячэнне занятасці насельніцтва.
„Асабліва старанна трэба абмеркаваць прапановы ўрада па забеспячэнні занятасці насельніцтва. Я абяцаў, што да канца гэтага года мы распрацуем і прымем дэкрэт прэзідэнта, які будзе развіваць вядомы дэкрэт №3, — цытуе Лукашэнку прэс-служба прэзідэнта. — Мы з вамі тады дамовіліся, каб нас не крытыкавалі і не называлі рэтраградамі, мы павінны дапрацаваць гэты праект з улікам тых недахопаў і, магчыма, памылак, якія былі дапушчаныя пры распрацоўцы дэкрэта №3, зрабіць яго прыземленым”.
Кіраўнік дзяржавы падкрэсліў, што дакумент павінен быць збалансаваным. „З аднаго боку, людзям даць магчымасць працаўладкавацца, з іншага боку — прымусіць працаваць тых, хто сёння можа, але не хоча”, — сказаў ён.
„Другое канцэптуальнае патрабаванне: не мы адсюль, з цэнтра, павінны вышукваць гэтых непрацуючых людзей і прымяняць да іх меры. Яны жывуць у канкрэтных гарадах, канкрэтных сёлах, і там ёсць органы ўлады, якія разбяруцца, можа чалавек працаваць, не можа, трапіў ён у цяжкую сітуацыю ці не патрапіў”, — дадаў Лукашэнка.
Паводле яго слоў, калі чалавек трапіў у цяжкую сітуацыю, яго трэба падтрымаць, а калі ён сапраўды дармаед — прымусіць працаваць. „І гэтым будуць займацца мясцовыя органы ўлады. Мы ім павінны стварыць прававы калідор, як юрысты кажуць, прававое поле”, — адзначыў кіраўнік дзяржавы.
Ён пацікавіўся ў распрацоўшчыкаў дакумента і чальцоў урада, ці рэалізаваныя ў новай рэдакцыі дэкрэта гэтыя канцэптуальныя патрабаванні.
Дэкрэт №3 „Аб папярэджанні сацыяльнага ўтрыманства” быў падпісаны Аляксандрам Лукашэнкам 2 красавіка 2015 года. Ён абавязваў грамадзян Беларусі, замежных грамадзян і асоб без грамадзянства, якія пастаянна пражываюць на тэрыторыі краіны і не ўдзельнічалі ў фінансаванні дзяржаўных расходаў або ўдзельнічалі ў такім фінансаванні менш за 183 каляндарныя дні за год, выплачваць збор у 20 базавых велічынь. Інакш ім пагражаў штраф альбо адміністрацыйны арышт.
Тэрмін выплаты збору скончыўся 20 лютага 2017 года. Паводле даных Міністэрства па падатках і зборах, збор выплацілі больш за 54 тысячы чалавек з 470 тысяч, якім былі разасланыя паведамленні.
Дэкрэт выклікаў абурэнне ў грамадстве і прывёў да масавых вулічных пратэстаў, пік якіх прыпаў на вясну гэтага года. Вулічныя акцыі жорстка разганяла міліцыя, іх удзельнікаў штрафавалі і каралі адміністрацыйным арыштам.
У пачатку ліпеня Лукашэнка распарадзіўся пачаць вяртанне збору, выплачанага па дэкрэце, але грошы вяртаюць толькі тым, хто змог працаўладкавацца. На нарадзе 3 жніўня ён падкрэсліў, што „ніякай адмены дэкрэта №3 быць не можа” — гаворка ідзе пра новую рэдакцыю гэтага дакумента. Кіраўнік дзяржавы даручыў ураду падрыхтаваць абноўлены варыянт да 1 кастрычніка. 2 кастрычніка стала вядома, што дапрацаваны варыянт дэкрэта №3 накіраваны на разгляд Лукашэнкі.
9 лістапада міністр працы і сацыяльнай абароны Ірына Касцевіч паведаміла журналістам, што ў новай рэдакцыі праект дэкрэта № 3 называецца „Аб спрыянні занятасці”. Згодна з дакументам, грамадзяне, прызнаныя сацыяльнымі ўтрыманцамі, павінны будуць кампенсаваць поўны кошт паслуг, якія льгатуюцца дзяржавай. „Сакрэтаў ніякіх няма. Ужо неаднаразова мы казалі, што абноўленая версія дэкрэта №3 накіраваная перш за ўсё на спрыянне і стымуляванне занятасці, на актыўную палітыку занятасці ў адносінах да тых грамадзянам, якія хочуць працаваць”, — заявіла Касцевіч.
На пытанне, як плануецца стымуляваць тых, каго прызнаюць „дармаедамі”, яна адказала: „Я не ведаю наконт „дармаедаў” і не хачу прамаўляць гэтыя словы. Але перш за ўсё абноўлены дэкрэт №3 накіраваны ў тым ліку і на выхад з ценю тых, хто займаецца ўтоенай занятасцю. Каб сапраўды вывесці гэтых людзей на рынак працы, мы плануем поўную кампенсацыю тых выдаткаў, якія сёння льгатуюцца з боку дзяржавы”. „Якія гэта будуць паслугі, будзе яшчэ разглядацца”, — дадала міністр.
Глядзіце таксама
