Лукашэнка: Расею нам ніхто не заменіць
Беларусь, усталяваўшы шматфарматныя адносіны з Расейскай Федэрацыяй, працягне супрацоўніцтва з ёй як з вельмі блізкай, брацкай дзяржавай. Пра гэта, як паведамляе дзяржаўнае агенцтва БелТА, заявіў Аляксандр Лукашэнка, выступаючы 15 студзеня на пасяджэнні шостай пазачарговай сесіі Палаты прадстаўнікоў Нацыянальнага сходу пятага склікання.
„Расею нам ніхто не заменіць, — сказаў ён. — І калі мы вядзем дыялог з Захадам, з ЕЗ, з Амерыкай, іншымі, мы задаем адно пытанне, і я пра гэта адкрыта кажу: „Вы нам заменіце Расію?” Не. Тады навошта вы нас у гэта цягнеце? На прыкладзе брацкай Украіны мы ўжо пераканаліся, у што гэта выліваецца ў крайнім выпадку”.
Ён падкрэсліў, што Беларусь самым цесным чынам звязаная з Расеяй гістарычна і эканамічна. „І калі нам было цяжка, як бы там ні было, чаго б гэта нам ні каштавала, Расея заўсёды падстаўляла сваё плячо. Але не без праблем, якія, дарэчы, ствараліся на роўным месцы”, — адзначыў Лукашэнка.
Афіцыйны лідар падкрэсліў, што Беларусь заўсёды адкрыта заяўляе пра сваю пазіцыю і ніколі не паводзіла сябе па-здрадніцку ў адносінах да Расеі.
