Ля Камароўскага рынка прайшлі выбарчыя пікеты (абноўлена)

таму

Выдрукаваць Пракаментаваць (0) Падзяліцца

Прыкладна а 15 гадзіне людзей каля Камароўскага рынку стала менш. 14 чэрвеня – гэта апошняя нядзеля традыцыйных масавых пікетаў каля Камароўкі, бо 19 чэрвеня сканчаецца збор подпісаў.

***

Людзі стаяць у чарзе, каб паставіць свой подпіс. Хтосьці спявае знакамітую песню Цоя «Перемен требуют наши сердца»

***

Жанчына кажа пра цяжкае жыццё, пра недахоп грошай. «Мы, прадпрымальнікі, якія чэсна плацілі падаткі, але нас выгналі з рынку. У мяне не засталося зубоў, пенсія 170 рублёў! А мы, старыя, не сталі патрэбныя. Я вельмі прашу, Аляксандр Рыгоравіч, разгледзьце маю скаргу, бо лісты да вас не даходзяць!» Жанчына плача. Жанчына давала стрым радыё «Свабода». «Я хадзіла шукала, дзе пікеты Лукашэнка, каб звярнуцца да яго, але не знайшла іх. І таму прыйшла сюды, на Камароўскі рынак. Я вельмі прашу, Аляксандр Рыгоравіч, разгледзьце маю скаргу!»

***

За сходам сочаць незалежныя назіральнікі Control.by

Яны налічылі па стане на 13 гадзін каля 118 удзельнікаў сходаў.

А супрацоўнікаў у цывільным – каля 40 чалавек.

***

Жанчына праспявала песню, прысвечаную Лукашэнка. У песні такія словы:

«Ты обещал, все будет как в сказке, ты не жалел романтических фраз… Сказки, сказочки не рассказывай!»

І пасля выканання песні жанчына дадала:

«Ну что сказочник, доигрался, остался у разбитого корыта!»

***

Тры кандыдаты – Губарэвіч, Вольга Кавалькова і Мікалай Казлоў абвесцілі, што збіраюцца правесці пікет у чацвер, у 18.00, 18 чэрвеня, каля Белдзяржфілармоніі, у апошні дзень збору подпісаў. Пікет у падтрымку тых кандыдатаў, супраць каторых альбо праведзены ўжо рэпрэсіўныя дзейства, альбо толькі пачынаюцца. «Давайце пакажам Лукашэнка, што нас шмат. Мы патрабуем сумленных выбараў». Кандыдаты адзначаюць, што гэта легальны пікет. «Нельга дапусціць, каб палітычна матываваныя рэпрэсіі працягваліся. Нельга дазволіць, каб Лукашэнка перамог на гэтых выбарах. Ён кажа, што назбіраў 1,5 млн подпісаў. Але гэта хлусня».

***

У гукаузмацняльнік Юрый Губарэвіч заклікае запісвацца назіральнікамі ў камісіі.

***

Людзі даюць інтэрв’ю на стрымах. Адна з жанчын кажа: «Выбары былі нелегітымнымі з 1994 года. І гэта павінны ведаць усе».

***

Працягваюцца пікеты па зборы подпісаў за альтэрнатыўных кандыдатаў. Яны традыцыйна ў нядзелю выстаўленыя на пляцоўцы каля Камароўскага рынку ў Менску. Людзей значна менш, чым у папярэднія дні. Але супрацоўнікі органаў, апранутыя ў цывільнае, пільна сочаць за тым, што тут адбываецца.

Беларускае Радыё Рацыя

***

14 чэрвеня ў Беларусі працягваецца збор подпісаў за вылучэнне кандыдатамі ў прэзідэнты Беларусі. Да канца збору подпісаў засталося менш за тыдзень.

Свабода вядзе жывую трансляцыю з Камароўскага рынка ў Менску, дзе праходзяць пікеты па зборы подпісаў за прэтэндэнтаў на найвышэйшую пасаду.

14 чэрвеня ля Камароўскага рынку стаяць некалькі намётаў ініцыятыўных груп патэнцыйных кандыдатаў: Сяргея Чэрачня, Валера Цапкалы, Віктара Бабарыкі, Андрэя Дзмітрыева, Вольгі Кавальковай, Мікалая Казлова і Юрася Губарэвіча. Чэргаў ля намётаў сёння не відаць, але перыядычна людзі падыходзяць і ставяць свае подпісы.

Нягледзячы на нешматлюднасць сённяшніх пікетаў, на пад’ездзе да Камароўкі дзяжураць экіпажы ДАІ, за пікетамі назіраюць праваахоўнікі ў цывільным, здымаюць прысутных на камеры.

Ініцыятыўная група патэнцыйнай кандыдаткі ў прэзідэнты Святланы Ціханоўскай збіраць подпісы ў Менску больш не будзе: 11 чэрвеня Ціханоўская абвясціла аб прыпыненні збору подпісаў на пікетах у Менску і абласных цэнтрах да канца тыдня. Прычынай стала небяспека правакацый. У іншых гарадах збор подпісаў працягваецца. Муж Святланы Ціханоўскай блогер Сяргей Ціханоўскі цяпер знаходзіцца ў карцары ў следчым ізалятары № 1, яго будуць трымаць за кратамі прынамсі да дня прэзідэнцкіх выбараў.

Раней на подступах да Камароўкі людзі выстрайваліся ў кіламетровыя чэргі, каб аддаць голас за Ціханоўскую і іншых альтэрнатыўных прэтэндэнтаў.

Збор подпісаў будзе працягвацца да 19 чэрвеня. Цяпер патэнцыйных кандыдатаў 14, у іх ліку Аляксандр Лукашэнка. Некаторыя з прэтэндэнтаў заяўлялі, што выкарыстоўваюць гэты этап толькі для агітацыі, але не маюць мэты трапіць у бюлетэні.

svaboda.org