Макей: Мы заклікаем ЕЗ зняць абмежавальныя меры ў дачыненні да Беларусі
Беларусь заклікае Еўразвяз адмяніць абмежавальныя меры ў дачыненні да краіны, заявіў міністр замежных спраў Уладзімір Макей 22 мая ў Менску на сустрэчы з пасламі па асаблівых даручэннях краін — членаў ЕЗ па справах Усходняга партнёрства.
„Мы шкадуем, што ў лютым Еўразвяз працягнуў абмежавальныя меры ў дачыненні да Беларусі, якія ўжо даўно страцілі нейкае рацыянальнае тлумачэнне, — сказаў Макей. — У сувязі з гэтым мы працягваем заклікаць ЕЗ зняць абмежавальныя меры, якія застаюцца”.
Паводле яго слоў, пазітыўнае супрацоўніцтва за апошнія некалькі гадоў прынесла „значна больш станоўчых вынікаў, чым папярэднія два дзесяцігоддзі санкцый”. У якасці кроку да зняцця астатніх абмежавальных мер ён адзначыў выключэнне спартыўнай зброі са зброевага эмбарга.
Макей таксама прывітаў намеры ЕЗ пашыраць адносіны з Беларуссю і паставіць іх на структураваную аснову.
23 лютага Савет ЕЗ яшчэ на год, да 28 лютага 2019 года, працягнуў абмежавальныя меры ў дачыненні да Беларусі. Яны ўключаюць эмбарга на пастаўкі зброі, забарону на экспарт тавараў для ўнутраных рэпрэсій, замарожванне рахункаў і забарону на паездкі на тэрыторыю ЕС у дачыненні да чатырох чалавек, якіх лічаць датычнымі да гвалтоўных знікненняў двух апазіцыйных палітыкаў, бізнесмена і журналіста ў 1999 і 2000 гадах. Пад санкцыямі застаюцца Уладзімір Навумаў (былы міністр унутраных спраў), Віктар Шэйман (былы кіраўнік Адміністрацыі прэзідэнта), Юрый Сівакоў (у канцы 1990-х гадоў, у перыяд знікнення апазіцыйных палітыкаў, займаў пасаду кіраўніка МУС) і Дзмітрый Паўлічэнка (камандзір брыгады спецназа ўнутраных войскаў МУС).
Пры гэтым Савет ЕС працягнуў выключэнне для экспарту ў Беларусь біятлоннага абсталявання — яго пастаўкі дазволеныя пры ўмове атрымання папярэдняга дазволу кампетэнтных нацыянальных органаў у кожным канкрэтным выпадку.
Абмежавальныя меры ў дачыненні да Беларусі былі ўпершыню ўведзеныя ў 2004 годзе ў сувязі са знікненнем апазіцыйных палітыкаў Віктара Ганчара і Юрыя Захаранкі, журналіста Дзмітрыя Завадскага і бізнесмена Анатоля Красоўскага. Пазней Савет ЕЗ прыняў далейшыя абмежавальныя меры ў дачыненні да асоб, якія ўдзельнічалі ў парушэнні міжнародных выбарчых стандартаў і правоў чалавека ў краіне, а таксама ў барацьбе з грамадзянскай супольнасцю і дэмакратычнай апазіцыяй.
Эмбарга на пастаўкі зброі было ўведзенае ў 2011 годзе.
15 лютага 2016 года Савет ЕЗ прыняў рашэнне зняць абмежавальныя меры ў дачыненні да 170 фізічных асоб і чатырох кампаній, уведзеныя пасля жорсткага разгону дэманстрацыі супраць фальсіфікацый выбараў 19 снежня 2010 года. Пры гэтам было захаванае эмбарга на пастаўкі зброі і санкцыі ў дачыненні да чатырох асоб.
Фота Sputnik Беларусь
Глядзіце таксама
