Марына Адамовіч: Хто здраджвае ідэалам, не мае ні грошай, ні ідэалаў
Хутка сканчаецца 3-х гадовы тэрмін пакарання Статкевіча турэмным рэжымам, і ён павінен быць пераведзены ў калонію. Марына Адамовіч, жонка палітзняволенага Мікалая Статкевіча мела з мужам кароткатэрміновае спатканне ў магілёўскай турме №4. Гэта было другое спатканне за год.
Падчас размовы, кажа Марына Адамовіч, былі абмеркаваныя і грамадска – палітычныя тэмы. У тым ліку аб магчымым вылучэнні Мікалая Статкевіча адзіным кандыдатам ад апазіцыі на чарговыя прэзідэнцкія выбары
Марына Адамовіч: Другая сустрэча ў гэтым годзе цягнулася дзве гадзіны. Як заўсёды, гэта была кароткая сустрэча праз шкло, праз краты са слухаўкай, але ўсё ж такі яна адбылася. Я мела радасць і шчасце яго пабачыць!
РР: А Мікалая Статкевіча павінны перавесці ўжо ў калонію?
Марына Адамовіч: Праз літаральна тры тыдні завяршаецца трохгадовы турэмны тэрмін, на які ўё быў асуджаны рашэннем Шклоўскага суда 12 студзеня 2012 года. Так што, у прынцыпе, у гэтыя кароткія дні яго павінны этапаваць некуды ў калонію.
РР: Што вы абмяркоўвалі? Ці гаварылі пра яго магчымае вылучэнне адзіным кандыдатам?
Марына Адамовіч: Безумоўна гэта было. Безумоўна Мікола ўдзячны за любую форму падтрымкі, якая яму можа быць выказаная ў гэтай сітуацыі. Але ён заклікае паплечнікаў, сяброў і калег па дэмакратычным лагеры да адзінства. Што тычыцца яго канкрэтных просьбаў ці зваротаў да таварышаў, то гэта я спачатку ім перадам….
РР: А калі яго ініцыятыўную групу проста не зарэгіструюць?
Марына Адамовіч: Ведаеце, мадам Ярмошынай мы адказваць не будзем. Тое, што тычыцца мяне, я ведаю, што рабіць. Спадзяюся, што астатнія таксама ведаюць.
РР: Ці абмяркоўвалі вы сітуацыю вакол канфлікту Расея – Україна? І як яна ўплывае на свет, на Беларусь?
Марына Адамовіч: Вельмі коратка гэта абмяркоўвалі ў святле эканамічных наступстваў для нашай краіны. А Мікола ўжо не адзін раз выказваўся з гэтай нагоды. Яго пазіцыя вельмі вядомая. Больш за тое, не так даўно ён звярнуўся да калег па сацыял-дэмакратычным лагеры, я маю на ўвазе сусветную сацыял-дэмакратыю. Праз партыю еўрапейскіх сацыялістаў, праз сацыялістычны інтэрнацыянал з просьбай падтрымаць урад Украіны. І завершыў ён свой гэты зварот словамі, што нельга здраджваць ідэалам з-за нейкіх эканамічных выгодаў ад Расеі. Той, хто здраджвае ідэалам, як правіла, не мае ні грошай, ні ідэалаў.
РР: Да Міколы зараз працяваюць звяртацца з патрабаваннем напісання прашэння аб памілаванні?
Марына Адамовіч: На сённяшні дзень такіх прапановаў няма.
Па словах Марыны Адамовіч, яна перадасць меркаванні Мікалая Статкевіча аб магчымых сцэнарах прэзідэнцкай выбарчай кампаніі прадстаўнікам дэмакратычнай апазіцыі.
Odtwarzacz plików dźwiękowych
Генадзь Барбарыч, Беларускае Радыё Рацыя
Глядзіце таксама
