Мікалай Статкевіч просіць Ангелу Меркель праверыць «фрау А.» на дэтэктары хлусні
Апазіцыйны палітык Мікалай Статкевіч накіраваў канцлеру Германіі Ангеле Меркель ліст, у якім просіць праверыць рэчаіснасць заявы грамадзянкі гэтай краіны ў беларускае пасольства пра магчымасць падрыхтоўкі ў Беларусі масавых беспарадкаў. Тэкст ліста палітык размясціў на сваёй старонцы ў „Фэйсбуку”.
Як паведамлялася, 11 красавіка газета Адміністрацыі прэзідэнта „СБ. Беларусь сегодня” са спасылкай на матэрыялы следства апублікавала артыкул „Імя ім — легіён”. У ёй паведамляецца, што 20 фігурантам справы аб падрыхтоўцы масавых беспарадкаў („справа „Белага легіёну”) выстаўленае яшчэ адно абвінавачанне — у стварэнні незаконнага ўзброенага фармавання (артыкул 287 Крымінальнага кодэкса). Гэтую інфармацыю БелаПАН пацвердзілі ў прэс-службе КДБ.
У артыкуле сцвярджаецца, што „востры сігнал паступіў ад грамадзянкі Германіі з беларускімі каранямі”. „Назавем яе фрау А. Цалкам яе прозвішча кампетэнтным асобам вядомае, — напісала газета. — Дама была блізка знаёмая з французам па імені Мішэль (аматары канспіралогіі разумеюць, што ў мэтах бяспекі і гэтае імя адкрыта называць нельга), які, у сваю чаргу, кантактуе з Саннікавым і Бандарэнкам, што пражываюць у Польшчы. Якія, калі памятаеце, пісалі некалькі гадоў таму слёзную просьбу Прэзідэнту аб сваім раскаянні і памілаванні. Датэрмінова пакінуўшы зоны, „раскаянцы” з`ехалі на заходнія хлябы і ўзяліся за сваё. Менавіта яны і прагаварыліся Мішэлю аб планах на 25 сакавіка. Француз падзяліўся „сакрэтамі” з сяброўкай А. Так яна даведалася, што на 25—26 сакавіка ў Мінску рыхтуюцца не проста беспарадкі, а сапраўдныя баі. Прычым не толькі з міліцыяй. Сцвярджалася, што ў Мінск едуць баевікі, вось іх і будуць біць мясцовыя „патрыёты”. <…> Шакаваная беларуская берлінка паспяшалася ў пасольства і ўласнаручна напісала заяву на імя Прэзідэнта, молячы прыняць „неадкладныя меры”, паколькі баялася, што „пагромы могуць пагражаць яе хворай маці”, якая жыве ў цэнтры Менска”.
Статкевіч у лісце Меркель просіць яе „ўзяць удзел у лёсе больш як 20 чалавек, якія сталі закладнікамі з-за паклёпніцкага даносу грамадзянкі ФРГ”.
„Улічваючы, што гаворка ідзе пра лёс дзясяткаў беларускіх грамадзян, а таксама членаў іх сем’яў, прашу вас даць распараджэнне органам правапарадку вашай краіны запытаць звесткі пра грамадзянку ФРГ, якая напісала ліст Лукашэнку. Кантактныя звесткі гэтай грамадзянкі ёсць у беларускіх спецслужбах, а фотакопія яе ліста сёння была апублікаваная дзяржаўнымі СМІ. Прашу таксама правесці допыт гэтага „сведкі” з выкарыстаннем дэтэктара хлусні. Вынікі гэтага допыту прашу перадаць беларускім органам дазнання, а таксама апублікаваць у СМІ”, — напісаў палітык.
У лісце Статкевіч адзначае, што „за апошнія некалькі тыдняў больш за тысячу чалавек былі затрыманыя за ўдзел у выключна мірных акцыях пратэсту”. Доказы іх „віны” бессаромна фальсіфікаваліся. Падчас арыштаў многіх збівалі і катавалі”.
„Дзеянні беларускіх уладаў выходзяць за межы Рэспублікі Беларусь. Яны тычацца рэпутацыі вашай краіны і нямецкіх грамадзян, якіх беларускі дыктатар выкарыстоўвае для расправы над іншадумцамі. Ваша дапамога ў правядзенні сумленнага расследавання і вызваленні беларускіх грамадзян, якія незаконна ўтрымліваюцца ў засценках КДБ, будзе неацэнным унёскам у прасоўванне дэмакратычных каштоўнасцяў і ва ўсталяванне законнасці і парадку на еўрапейскім кантыненце”, — напісаў ён.
Затрыманні грамадскіх актывістаў пачаліся 21 сакавіка, праз некалькі гадзін пасля заявы Аляксандра Лукашэнкі аб баевіках, якія „рыхтуюць правакацыю са зброяй”. 23 сакавіка дзяржаўныя тэлеканалы паведамілі, што ў рамках распачатай КДБ крымінальнай справы па факце навучання і падрыхтоўкі да ўдзелу ў масавых беспарадках затрымана 26 чалавек.
Многія з затрыманых — былыя члены патрыятычнай арганізацыі „Белы легіён”, якая не існуе ўжо 15 гадоў, а таксама актывісты афіцыйна зарэгістраванага бабруйскага клуба „Патрыёт”. У межах гэтай крымінальнай справы таксама былі затрыманыя некаторыя актывісты „Маладога фронту” (арганізацыя не зарэгістраваная ў Беларусі) на чале са Зміцерам Дашкевічам.
Справа на падставе арт. 287 КК у Беларусі распачынаецца ўпершыню. Гэты артыкул гаворыць: „Стварэнне незаконнага ўзброенага фармавання пры адсутнасці прыкмет артыкула 286 („Бандытызм”. — БелаПАН.) гэтага кодэкса, або кіраванне такім фармаваннем, або ўдзел у ім караюцца абмежаваннем волі на тэрмін да пяці гадоў ці пазбаўленнем волі на тэрмін ад трох да сямі гадоў”. У якасці заўвагі адзначаецца, што асоба, якая добраахвотна спыніла ўдзел у незаконным узброеным фармаванні і здала зброю, вызваляецца ад крымінальнай адказнасці згодна з гэтым артыкулам.
Варта адзначыць, што затрыманні ў межах гэтай крымінальнай справы многія аналітыкі звязваюць са спробамі ўладаў нейтралізаваць апазіцыю і грамадскіх актывістаў, каб не дапусціць новай хвалі вулічных акцый супраць сацыяльна-эканамічнай палітыкі ўладаў, якія праходзілі ў лютым—сакавіку ў розных гарадах Беларусі.
belapan.by
