МЗС: Беларусь чакае поўнай адмены санкцый ЕЗ як мага хутчэй
Беларусь чакае поўнай адмены санкцый Еўразвяза як мага хутчэй. Пра гэта заявіў прэс-сакратар Міністэрства замежных спраў Дзмітрый Мірончык 15 кастрычніка на брыфінгу ў Менску, адказваючы на пытанне аб рэакцыі беларускага боку на інфармацыю пра падрыхтоўку прыпынення санкцый адносна Беларусі.
Дзмітрый Мірончык
„Мы каментуем канкрэтныя падзеі і факты. Наша пазіцыя па тэме антыбеларускіх санкцый вядомая: яны паказалі сваю неэфектыўнасць і бесперспектыўнасць. Чакаем іх поўнай адмены і спадзяемся, што гэта адбудзецца як мага хутчэй”, – заявіў Мірончык.12 кастрычніка міністры замежных спраў краін Еўразвяза на пасяджэнні Савета ЕЗ дамовіліся пра прыпыненні на чатыры месяцы санкцый адносна Беларусі, аднак афіцыйнае рашэнне па гэтым пытанні павінна быць прынятае да канца кастрычніка.
Пад візавыя і фінансавых санкцыі Еўразвяза трапляюць 175 беларускіх грамадзян і прыкладна 20 прадпрыемстваў, якіх ЕС абвінавачвае ў парушэнні правоў чалавека і фінансаванні беларускага рэжыму.
