МЗС раскрытыкавала рэзалюцыю Еўрапарламента
Беларускае МЗС раскрытыкавала рэзалюцыю Еўрапарламента пра сітуацыю ў краіне.
„Выклікае шкадаванне, што ў дэпутатаў Еўрапарламента не хапіла часу або жадання азнаёміцца з афіцыйным пунктам гледжання на падзеі двухтыднёвай даўнасці і высветліць усе пытанні ў рэжыме прамога дыялогу”, — заявіў афіцыйны прадстаўнік знешнепалітычнага ведамства Дзмітрый Мірончык.
„Мы гатовыя абмяркоўваць з нашымі замежнымі партнёрамі любыя тэмы, даваць адказы на любыя пытанні, у тым ліку тыя, па якіх нашы пазіцыі разыходзяцца, — адзначыў ён. — Менавіта ў такім ключы мы размаўлялі з тымі прадстаўнікамі ЕЗ, якіх па-сапраўднаму хвалюе будучыня адносін з Беларуссю. Як ужо паведамляла МЗС, на гэтым тыдні ў Менску знаходзілася дэлегацыя з Бруселя і правяла грунтоўныя гутаркі ў дзяржорганах нашай краіны ў рамках пасяджэння каардынацыйнай групы Беларусь — ЕЗ”.
„Метад вокрыкаў і павучанняў, што часцей за ўсё выкарыстоўвае Еўрапарламент, з Беларуссю не працуе. Крытыка, калі ёсць для яе падставы, павінна насіць канструктыўны і непрадузяты характар, улічваць аб’ектыўныя рэаліі і працэсы, якія адбываюцца ў нашай краіне і ў рэгіёне ў цэлым. Прынятая рэзалюцыя паказвае, што Еўрапарламент такую задачу перад сабой не ставіў”, — лічыць прадстаўнік МЗС.
„Разумеем, што пераадоленне негатыўных антыбеларускіх клішэ патрабуе часу і палітычнай мудрасці. Пачакаем…” — сказаў на заканчэнне Мірончык.
У рэзалюцыі, прынятай 6 красавіка на сесіі ў Страсбургу, Еўрапарламент асудзіў разгон мірных дэманстрацый пратэсту і рэпрэсіі ў дачыненні да грамадзян, якія ўзялі ўдзел у вулічных акцыях. Адзначаецца, што, нягледзячы на заклікі міжнароднай супольнасці да стрыманасці, рэакцыя сілавых структур была празмернай і непрапарцыйнай. Еўрапейскія парламентарыі асудзілі неабгрунтаваныя абмежаванні правоў на свабоду мірных сходаў, свабоду слова і асацыяцый, а таксама пераслед незалежных журналістаў, апазіцыі, праваабаронцаў і ўдзельнікаў пратэстаў.
У рэзалюцыі ўтрымліваецца заклік да беларускіх улад неадкладна і без якіх-небудзь умоваў вызваліць усіх затрыманых, а таксама адмяніць усе судовыя рашэнні ў дачыненні да ўдзельнікаў акцый пратэсту, журналістаў, праваабаронцаў, актывістаў грамадзянскай супольнасці і апазіцыі, якія былі затрыманыя падчас дэманстрацый.
Еўрапарламент заявіў пра непрымальнасць практыкі прэвентыўных арыштаў і запатрабаваў ад уладаў інфармаваць пра ўсіх затрыманых іх сем’і і грамадскасць. Дэпутаты заклікалі ўрад краіны пачаць адкрыты дыялог са сваімі грамадзянамі, арганізацыямі грамадзянскай супольнасці і незалежнымі СМІ, а таксама неадкладна правесці дакладнае і бесстаронняе расследаванне ўсіх паведамленняў аб адвольных затрыманнях і іншых парушэнняў правоў грамадзян. „У выпадку невыканання такіх расследаванняў ЕЗ можа прымяніць новыя абмежавальныя меры ў дачыненні да высокапастаўленых службовых асобаў, адказных за нядаўнія рэпрэсіі”, — гаворыцца ў рэзалюцыі.
