На сустрэчы з Лукашэнкам канцлер Аўстрыі ўзняў пытанне «дэфіцыту свабоды слова» ў Беларусі
Пытанне аб „дэфіцыце свабоды слова” ў Беларусі ўзняў канцлер Аўстрыі Себасцьян Курц на сустрэчы з Аляксандрам Лукашэнкам 29 сакавіка ў Менску.
У цэнтры ўвагі былі таксама іншыя тэмы, якія тычацца правоў чалавека, адзначаецца ў прэс-рэлізе, размешчаным на сайце кіраўніка аўстрыйскага ўрада.
„Уцягванне Беларусі ва Усходняе партнёрства Еўразвяза неабходнае для паскарэння неабходных рэформаў”, — заявіў Курц. Пры гэтым, паводле яго слоў, ад Беларусі не трэба патрабаваць зрабіць выбар паміж Расеяй і Еўропай, а хутчэй, прапанаваць канцэпцыю „і, і”, у якой вялікае значэнне мае паглыбленне супрацы ў рамках Усходняга партнёрства.
На сваёй старонцы ў „Твітэры” канцлер напісаў: „З прэзідэнтам Лукашэнкам я абмеркаваў таксама тэмы, дзе мы іншай думкі: вяршэнства права і правы чалавека, пры гэтым мы робім стаўку на дыялог па правах чалавека, які праводзіцца ЕЗ”. (Адбылося пяць раўндаў двухбаковага дыялогу, які Еўразвяз праводзіць на індывідуальнай аснове больш чым з 30 краінамі. — БелаПАН.)
Выказванні Лукашэнкі на тэму захавання правоў чалавека Курц і аўтары прэс-рэліза на яго сайце не прыводзяць.
У паведамленнях прэс-службы беларускага кіраўніка пра візіт канцлера абмеркаванне гэтых пытанняў не згадвалася.
Фота: president.gov.by
Глядзіце таксама
