Неабходна актуалізацыя Будапешцкага мемарандуму
Неабходна, каб Будапешцкі мемарандум, які гарантаваў бяспеку Беларусі ўзамен на вывад ядзернай зброі, быў актуалізаваны, – лічыць беларускі палітык, дырэктар цэнтра «Еўрапейскі дыялог» Анатоль Лябедзька. Гарантамі цэласнасці і бяспекі Беларусі ў лістападзе 1994 года сталі ЗША, Велікабрытанія, а таксама Расея, якая потым груба парушыла гэты мемарандум.
Анатоль Лябедзька нагадвае, што 10 гадоў таму ў Дзярждэпартамент ЗША некалькімі палітычнымі лідарамі была накіравана прапанова, каб ЗША знайшлі фармат прыняцця новага дакумента, які дазволіў бы рэальна выконваць тыя абавязкі, якія дэклараваны ў Будапешцкім мемарандуме. Напярэдадні магчымага візіту ў Менск дзяржсакратара ЗША Майкла Пампеа тэма зноўку становіцца актуальнай:
– Мы можам гэта нагадаць, што ў вас там 10 гадоў ляжыць такая папера, давайце рэфлексій. Мы звярталіся і да Макея, што ён мусіць бегаць не з нейкай фантастычнай ідэяй нейкіх хельсінкіт, якая абсалютна фантастычная. А проста ехаць у Кіеў, у Казахстан, ствараць кааліцыю і разам шукаць магчымасць як рэанімаваць Будапешцкі мемарандум. Таму што там закладзеныя фармальна вось гэтыя дэкларатыўныя гарантыі для Беларусі, але яны, як бачым па досведу Украіны, не працуюць.
Для дыпламатаў, і не толькі амерыканскіх і брытанскіх, але і для беларускіх, праца над тым, каб зрабіць Будапешцкі мемарандум эфектыўным дакументам, з’яўляецца адной з галоўных, – лічыць Анатоль Лябедзька.
Беларускае Радыё Рацыя
Глядзіце таксама
