Мікалаю Дзядку пагражае працяг тэрміну зняволення (абноўлена)
За тры з паловай месяцы да вызвалення палітвязню Мікалаю Дзядку пагражае працяг тэрміну зняволення. Супраць яго пачатая новая справа па абвінавачанні ў злосным непадпарадкаванні патрабаванням адміністрацыі турмы.
Праваабаронца Валянцін Стэфановіч лічыць, што гэта можа быць паўтор сітуацыі са Змітром Дашкевічам, якому таксама быў працягнуты на год тэрмін зняволення.
– Мікалаю прад’яўлена абвінавачванне па артыкуле “Сістэматычнае невыкананне законных патрабаванняў адміністрацыі папраўчай установы”. Яму пагражае, калі будзе прызнаны судом вінаватым, яшчэ год зняволення. Па нашым меркаванні, гэта звязанае з годам прэзідэнцкіх выбараў. Службы, напэўна, вырашылі такім чынам перастрахавацца, лічачы Дзядка асабліва небяспечным чалавекам, які схільны да арганізацыі акцый пратэсту.
Жонка палітвязня Валерыя Хоціна паведаміла, што Мікалаю зроблена псіхіятрычная экспертыза і ён знаходзіцца ў магілёўскай турме у адзіночнай камеры. На думку праваабронцаў, суд над Дзядком праўдападобна адбудзецца гэтак як і ў выпадку з Дашкевічам у закрытым рэжыме, нават без удзелу сваякоў.
Кастусь Бандарук, Беларускае Радыё Рацыя
* * *
Палітычнаму зняволенаму Мікалаю Дзядку ў Магілёўскай турме №4 правялі псіхолага-псіхіятрычную экспертызу, – пра гэта даведалася ягоная жонка Валерыя Хоціна.
Дзядок асуджаны на 4 гады і 6 месяцаў зняволення па так званай справе анархістаў. Яго прызналі вінаватым у злосным хуліганстве. 20-га лістапада, за 3,5 месца да вызвалення, супраць яго распачалі новую справу – за злоснае непадпарадкаванне патрабаванням адміністрацыі турмы. Мікалаю Дзядку пагражае новае зняволенне на тэрмін да аднаго году.
Паводле Валерыі Хоцінай, вынікі экспертызы пакуль невядомыя:
– Хіба што заўтра будуць прад’яўляцца канчатковыя абвінавачванні і магчыма ўжо пасля гэтага яго перавядуць у СІЗА. А так усё па-старому. Пакуль што ён сядзіць у адзіночнай камеры ў турме. Суд будзе выязны. Там СІЗА і турма побач, два розныя будынкі, але гэта ўсё належыць адной установе. І звычайна суды выяздыя. Туды прыязджае нейкі суд і паседжанне праводзіцца ў закрытым рэжыме.
Як кажа Валерыя Хоціна, з лістоў і тэлефоннай размовы з мужам у яе склалася ўражанне, што новая хваля ціску не зламала Мікалая.
„Ён больш хвалюецца за сваіх родных, чым за сябе. Першыя дні быў у трошкі падаўленым стане. Але зараз адчуваецца, што пераадолеў гэта. Нават у лісце напісаў, што магчымы датаковы год няволі – гэта ўсё ж менш, чым ён ужо адседзеў,” – кажа Валерыя Хоціна. Яна не выключае, што Мікалай прабудзе ў зняволенні да чарговых прэзідэнцкіх выбараў.
Генадзь Барбарыч, Беларускае Радыё Рацыя
Глядзіце таксама
