Палякі апублікавалі новыя дадзеныя аб крушэнні самалёта Качыньскага
Самалёт прэзідэнта Польшчы Леха Качыньскага, які разбіўся ў 2010 годзе паблізу аэрадрома Смаленск-Паўночны, пачаў распадацца яшчэ да сутыкнення з наземнымі аб’ектамі. Пра гэта заявіў у панядзелак, 10 красавіка, старшыня падкамісіі па расследаваньні авіякатастрофы Вацлаў Берчыньскі у інтэрв’ю польскаму тэлеканалу TVP.
Берчыньскі паказаў, што лайнер пачаў распадацца ў паветры і губляць свае часткі, якія сталі падаць на зямлю. Паводле яго слоў, бяроза, якую, згодна з расейскай версіяй крушэння, самалёт зачапіў, ідучы на пасадку ў густым тумане, не мае дачынення да катастрофы. Некаторыя абломкі самалёта знаходзяцца на значнай адлегласці ад гэтага дрэва.
Берчыньскі адзначыў, што камісія зрабіла новыя высновы пасля дэталёвага вывучэння размоваў экіпажа самалёта з вышкай кантролю руху ў Смаленску.
Авіялайнер Ту-154 з польскай урадавай дэлегацыяй на борце разбіўся 10 красавіка 2010 года. У выніку загінулі ўсе, хто быў у салоне – 86 афіцыйных асоб на чале з Качыньскім, а таксама экіпаж самалёта.
Прэзідэнт Польшчы і шэраг першых асоб дзяржавы накіроўваліся на жалобныя мерапрыемствы ў памяць аб Катынскім расстрэле супрацоўнікамі НКВД СССР польскіх вайскоўцаў.
Падчас першага расследавання прычын катастрофы самалёта польскага прэзідэнта Качыньскага, вынікі якога былі прадстаўлены ў 2010 годзе, эксперты прыйшлі да высновы, што лайнер пацярпеў крушэнне з-за таго, што экіпаж паспрабаваў здзейсніць пасадку ў густым тумане. Аднак кансерватыўны ўрад Польшчы, які прыйшоў да ўлады ў 2015 годзе, ініцыяваў паўторнае расследаванне трагедыі, так як у краіне па-ранейшаму абмяркоўваюцца шматлікія тэорыі крушэння прэзідэнцкага самалёта, у тым ліку і версія тэракту.
Фота Reuters
