Паміж Беларуссю і Ізраілем пачаў дзейнічаць бязвізавы рэжым
26 лістапада набывае моц пагадненне аб бязвізавым рэжыме паміж Беларуссю і Ізраілем. Візы адмененыя для грамадзянаў, якія падарожнічаюць з турыстычнай мэтай.
Міжурадавае пагадненне аб адмене візаў краіны падпісалі 19 верасня 2014 года. У адпаведнасці з артыкулам 7 пагаднення дакумент набывае моц праз 90 дзён пасля атрымання па дыпламатычных каналах апошняга пісьмовага апавяшчэння, якім бакі інфармуюць адзін аднаго пра выкананне ўсіх неабходных унутрыдзяржаўных працэдураў.
Беларускі бок яшчэ ў студзені 2015 года праінфармаваў ізраільскіх калег пра выкананне ўсіх прадугледжаных працэдураў. Затрымка ратыфікацыі пагаднення Ізраілем была звязаная з правядзеннем у гэтай краіне 17 сакавіка датэрміновых парламенцкіх выбараў. Адмену візавага рэжыму з Беларуссю кабінет міністраў Ізраіля зацвердзіў 16 жніўня.
Як растлумачыла БелаПАН часовы павераны ў справах Ізраіля ў Беларусі Юлія Рачынскі, візы адмененыя толькі для тых грамадзян, якія падарожнічаюць з турыстычнай мэтай. „Для паездак з іншай мэтай дагэтуль патрабуецца віза”, — дадала яна.
Якія-небудзь дадатковыя дакументы для турыстычнай паездкі ў Ізраіль, паводле слоў Рачынскі, беларускім грамадзянам браць не абавязкова. „Паўнамоцтвы па санкцыянаванні ўезду ў Ізраіль пераходзяць ад пасольства да пагранічнай службы, і калі ў людзей ёсць нейкія апаскі, яны могуць узяць з сабой або нумар пасведчання асобы грамадзяніна Ізраіля, які іх запрашае, або копію пасведчання асобы для прад`яўлення пагранічнікам”, — сказала дыпламат. Астатнія дакументы беларускія грамадзяне могуць браць па сваім меркаванні. У прыватнасці, турысты могуць дадаткова прадставіць пагранічнікам турыстычную праграму, пацвярджэнне браніравання гатэля. „Ізноў-такі, гэта не афіцыйнае патрабаванне — гэта рэкамендацыя тым, хто хоча перастрахавацца”, — адзначыла Рачынскі.
Паводле яе слоў, пытанні ў пагранічнікаў могуць з`явіцца да людзей, якія нядаўна ўзялі шлюб з грамадзянамі Ізраіля. „Мы рэкамендуем ім афармляць запрашэнне праз МУС Ізраіля”, — адзначыла часовы павераны.
Яна таксама падкрэсліла, што ў выпадку адмовы ва ўездзе ў Ізраіль у беларускіх грамадзянаў будзе магчымасць на працягу двух сутак абскардзіць гэта рашэнне. Турыстам рэкамендуецца перад паездкай даведацца нумар тэлефона консульскага аддзела беларускага пасольства ў Ізраілі, каб мець магчымасць звярнуцца па юрыдычную дапамогу ў выпадку неабходнасці.
Рачынскі паведаміла, што пытанне пра закрыццё пасольства Ізраіля ў Беларусі пакуль не вырашана. „Спадзяемся, што рашэнне да канца года будзе прынята, і мы будзем дакладна ведаць, ці працягне пасольства сваё існаванне. Пакуль мы працуем, як і працавалі дагэтуль”, — заявіла дыпламат.
Нагадаем, 4 жніўня гэтага года ўрад Ізраіля падтрымаў прапанову прэм`ер-міністра Біньяміна Нетаньяху аб ліквідацыі сямі дыпламатычных прадстаўніцтваў у сувязі са скарачэннем выдаткаў. У ліку дыппрадстаўніцтваў, запланаваных да скарачэння, ізраільскі прэм`ер назваў і пасольства ў Беларусі.
Крыху пазней былы ізраільскі пасол у Беларусі Іосіф Шагал паведаміў БелаПАН, што ў МЗС Ізраіля створана камісія па вывучэнні пытання скарачэння сямі дыппрадстаўніцтваў у свеце. Ці закране гэта скарачэнне пасольства ў Беларусі, невядома, дадаў Шагал.
Дыпламатычная місія Іосіфа Шагала ў Беларусі завяршылася ў канцы жніўня. Калі ў Беларусь прыбудзе новы пасол Ізраіля, пакуль невядома, паведаміла Юлія Рачынскі.
.
Глядзіце таксама
