Партрэт Юрыя Захаранкі каля помніка загінулым міліцыянтам
Актывісты ўшанавалі памяць зніклага 17 гадоў таму экс-міністра ўнутраных спраў Юрыя Захаранкі. Ягоны партрэт быў усталяваны каля помніка міліцыянтам, якія загінулі пры выкананні службовага доўгу, у Менску.
«Мы пямятаем. 17 гадоў таму быў выкрадзены Юрый Захаранка», — напісалі пра акцыю ў сацыяльных сетках.
Экс-міністр унутраных спраў, адзін з лідараў апазіцыі ў канцы 1990-х гадоў Юры Захаранка быў выкрадзены невядомымі 7 траўня 1999 года ў Менску, непадалёк ад свайго дома. Афіцыйнае следства дагэтуль не знайшло злачынцаў, якія выкралі апазіцыянера, і тых, хто замовіў гэтае выкраданне. Аднак, паводле актывістаў апазіцыі, праваабаронцаў і былых супрацоўнікаў міліцыі, да выкрадання былі датычныя цяперашні памочнік Лукашэнкі Віктар Шэйман, былы камандзір брыгады спецназу ўнутраных войскаў Дзмітры Паўлічэнка, а замова на злачынства прыйшла з самага верху беларускага кіраўніцтва.
Два месяцы таму 92-гадовай маці Юрыя Захаранкі Ульяне Рыгораўне, якая жыве ў пасёлку Васілевічы Гомельскай вобласці, з пракуратуры зноў адказалі, што расследаванне справы аб знікненні яе сына на чарговы тэрмін працягнутае.
Беларускае Радыё Рацыя
Фота Максіма Вінярскага
Глядзіце таксама
