Паслы краін ЕЗ, Вялікабрытаніі, ЗША і Японіі ўсклалі кветкі да месца гібелі пратэстоўца
Акрэдытаваныя ў Беларусі дыпламаты краін ЕЗ, Вялікабрытаніі, ЗША і Японіі 13 жніўня ўсклалі кветкі да месца гібелі ўдзельніка пратэстаў у Менску — каля станцыі метро „Пушкінская”. Іх віталі людзі, якія сабраліся, — каля тысячы чалавек. Яны апладзіравалі і крычалі „Спасибо”, „Дзякуй”, „Жыве Беларусь”.
Размаўляючы з журналістамі пасля ўскладання кветак, кіраўнік прадстаўніцтва ЕЗ у Беларусі Дзірк Шубель заявіў: „Мы смуткуем па тых ахвярах, якія ўжо мелі месца, і прыйшлі сюды, каб выказаць салідарнасць з ахвярамі гвалту ў розных гарадах вашай краіны. Мы заклікаем улады дазволіць людзям рэалізоўваць сваё права на мірны пратэст і заклікаем да вызвалення ўсіх, хто быў незаконна затрыманы”.
Шубель таксама паведаміў, што заўтра адбудзецца пазачарговае пасяджэнне Савета міністраў замежных спраў краін ЕЗ, на якім будзе прынятае рашэнне па Беларусі.
Фота: Тут.бай
