Польшча гатова прадаваць Украіне зброю
Пра гэта ў эфіры тэлеканала TVN24 заявіў міністр нацыянальнай абароны Польшчы Томаш Семоняк. Ён адзначыў, што гэтае пытанне не будзе абмяркоўвацца ў публічнай прасторы, пра што ёсць дамоўленасць з яго ўкраінскім калегам Валерыем Геляцеем, бо гэта могуць выкарыстаць у інфармацыйнай вайне.
Прафесар Вальдэмар Рэзмэр, кіраўнік аддзялення вайсковай гісторыі ўніверсітэта імя Мікалая Каперніка ў Торуні, адзначае, што Польшча не можа рэалізоўваць ініцыятывы, якія не вельмі добра ўспрымуць іншыя дзяржавы-чальцы НАТА:
– Я баюся адной рэчы: каб не дайшло да такой палітычнай сітуацыі, што за момант Польшча ў сваіх жэстах сімпатыі і дзеяннях датычна Украіны застанецца адна. А рэшта – магчыма, не ўлічваючы краін Балтыкі, – вельмі хутка знойдзе паразуменне з Расеяй.
У гэтым выпадку Польшча будзе ўспрымацца некаторымі як фактар дэстабілізацыі, які перашкаджае спакою і вядзенню бізнесу. Аднак, на думку прафесара Рэзмэра, ёсць іншы, больш важны чыннік у пытанні дапамогі Украіне:
– Гэта страх. Страх за тое, што зброя, якую мы перададзім, можа апынуцца зусім у іншых руках. І, на жаль, падзеі на ўсходзе Украіны паказалі, што вельмі лёгка гэтая зброя і нейкім дзіўным чынам трапляе ў рукі сепаратыстаў ва ўсходняй Украіне.
Прафесар Вальдэмар Рэзмэр дадае, што ў сеціве з’явіліся звесткі пра тое, што прадаюцца не толькі каскі і бронекамізэлькі, але нават аўтаматы Калашнікава. Таму, на яго думку, пакуль ва Украіне не будзе эфектыўнаага кантролю і мезанізму, які дапаможа пазбегнуць карупцыі, да таго часу зброя можа трапляць у непажаданыя рукі.
Яна Запольская, Беларускае Радыё Рацыя
Фота ria.ru
Глядзіце таксама
