Праваабаронцы абураныя „парадам” палонных у Данецку
Абурэнне праваабарончых арганізацый і міжнароднай супольнасці выклікаў учорашні прагон па вуліцах Данецка ўкраінскіх ваеннапалонных. Іх вялі пад дуламі аўтаматаў, а людзі на іх адрас выкрыквалі «фашысты», абражалі, кідалі яйкамі, камянямі і бутэлькамі.
Паводле старшыні Беларускага Хельсінкскага камітэта Алега Гулака, такое абыходжанне з’яўляецца грубым парушэннем Жэнеўскай Канвенцыі аб абыходжанні з ваеннапалоннымі:
– Аналізы нашых калег гэтай сітуацыі ўжо гучалі. Усё яны зводзяцца да таго, што гэта парушае Жэнеўскую Канвенцыю аб абыходжанні са зняволенымі. Я ад сябе хацеў бы яшчэ сказаць, што тое, што адбываецца ў Расеі і падкантрольных ёй тэрыторыях, проста жахліва. Кожны дзень новымі вачыма глядзіш на ўсё тое, што адбываецца, і разумееш небяспеку для нас.
У палонных, які ішлі вуліцамі Данецка, рукі былі счэпленыя ззаду, у якасці канвоя – баевікі з сабакамі ды зброяй. Пасля праходу калоны палонных асфальт дэманстратыўна памылі камунальнай тэхнікай. Такі быў адказ сепаратыстаў на афіцыйнае святкаванне 23-й гадавіны Незалежнасці Украіны. Нават у дзень нацыянальнага свята на Данбасе працягваліся баі.
Кастусь Бандарук, Беларускае Радыё Рацыя
Фота lpravda.com, news.bigmir.net
Глядзіце таксама
