Правацэнтрысцкая кааліцыя правяла пікет у Берасці
Пікет правацэнтрысцкай кааліцыі на цэнтральнай вуліцы Савецкай адбыўся ў Берасці. Мерапрыемства доўжылася некалькі гадзінаў ля кінатэатру Беларусь. У зборы подпісаў для патэнцыйных кандыдатаў на пасаду дэпутатаў прынялі ўдзел прадстаўнікі руха „За свабоду” і Аб’яднанай Грамадзянскай партыі. Лідар АГП Анатоль Лябедзька падкрэсліў, што кааліцыйныя пікеты даюць магчымасць лепш пачуць голас спікераў:
– У Берасці мы разам – правацэнтрысцкая кааліцыя. Лічу, што гэта добра, бо голас гучыць у тры разы мацней, таму што гаворыць і прадстаўнік Аб’яднанай грамадзянскай партыі, і руху “За свабоду”, і Беларускай хрысціянскай дэмакратыі. Гэта важна, гэта істотна, і гэта адметнасць сёлетняй кампаніі. Што датычыць настрояў у грамадстве. Пераважная большасць людзей крытычна ставіцца да таго, што робіць улада. Фактычна гэта і ёсць недавер уладзе. Але разам з тым, на другой шалі вагаў, бачым, што людзі не вераць у тое, што можна змяніць сітуацыю.
Па выніках пікету кожны кандыдат сабраў каля трох дзясяткаў подпісаў. Яны лічаць гэта добрым вынікам, паколькі грамадства праяўляе цікавасць да альтэрнатывы дзейнай уладзе.
Беларускае Радыё Рацыя
Глядзіце таксама
