Прэзідэнт Казахстана ўзнагародзіў Лукашэнку ордэнам Назарбаева
Прэзідэнт Казахстана Касым-Жамарт Такаеў узнагародзіў Аляксандра Лукашэнку ордэнам „Першы прэзідэнт Рэспублікі Казахстан — лідар нацыі Нурсултан Назарбаеў”. Адпаведны ўказ быў падпісаны 27 мая.
Ва ўказе, апублікаваным на афіцыйным сайце прэзідэнта Казахстана, адзначаецца, што ўзнагарода ўручаная ў гонар „25-годдзя ідэі аб еўразійскай інтэграцыі і 5-годдзя падпісання Дагавора аб Еўразійскім эканамічным саюзе, а таксама за асаблівы ўнёсак у паглыбленне і пашырэнне супрацы з Рэспублікай Казахстан”.
Акрамя Лукашэнкі гэтым жа ордэнам узнагароджаны прэзідэнт РФ Уладзімір Пуцін і прэзідэнт Кыргызстана Сааранбай Жээнбекаў.
Як паведамляе прэс-служба прэзідэнта Беларусі, сустрэча Лукашэнкі з Такаевым адбылася 28 мая ў Нур-Султане.
„Што да нашых адносін, яны заўсёды будуць добрымі, і я ніколькі не сумняваюся, што мы здолеем і дадаць у нашых адносінах”, — заявіў Лукашэнка на сустрэчы.
Ён адзначыў, што нядаўна прымаў пасла Казахстана ў Беларусі і „проста яму сказаў пра канкрэтныя сур’ёзныя кірункі, па якіх бакі могуць рушыць наперад у развіцці супрацы”.
29 мая Лукашэнка возьме ўдзел у пасяджэнні Вышэйшага Еўразійскага эканамічнага савета. „З улікам юбілейнай даты — пяцігоддзя дагавора аб Еўразійскім эканамічным саюзе — кіраўнікі дзяржаў абмяркуюць вынікі развіцця саюза і вызначаць далейшыя перспектывы сумеснай працы па паглыбленні еўразійскай інтэграцыі, якаснай рэалізацыі ўжо існых дамоўленасцей”, — паведаміла раней прэс-служба прэзідэнта Беларусі.
На саміт таксама вынесеныя пытанні, якія тычацца пашырэння міжнароднага супрацоўніцтва ЕАЭС, фармавання агульнага электраэнергетычнага рынку саюза, узаемадзеяння ў мытнай сферы, асноўных арыенціраў макраэканамічнай палітыкі на 2019—2020 гады, ходу рэалізацыі лічбавага парадку дня, стварэння Савета па прамысловай палітыцы ЕАЭС. Паводле вынікаў пасяджэння плануецца прыняць шэраг міжнародных дакументаў.
Фота sputnik.by
Глядзіце таксама
