Простыя расейцы падтрымліваюць пратэсты супраць інтэграцыі
СМІ Смаленскай вобласці – памежнага рэгіёну Расеі, дзе, здавалася б, тэма інтэграцыі з Беларуссю павінна быць найбольш актуальнай, практычна абышлі ўвагай менскія акцыі 7 і 8 снежня.
Але ў сацыяльных сетках акцыі пратэсту горача абмяркоўваюцца. У прыватнасці, відэа, дзе беларускія пратэстоўцы разрываюць партрэты Пуціна, набрала ў групе Readovka “ВКонтакте” каля 47 тысяч праглядаў і больш за 400 каментароў.
Значная частка гэтых каментароў – гэта словы падтрымкі. Паводле меркаванняў удзельнікаў дыскусіі, беларусы слушна робяць, калі адстойваюць суверэнітэт сваёй краіны.
На думку некаторых, стварэнне агульнай саюзнай дзяржавы – гэта пагроза таго, што Уладзімір Пуцін атрымае права балатавацца на пасаду прэзідэнта новага дзяржаўнага ўтварэння, што многія ў Расеі лічаць непажаданым. Некаторым хацелася б, каб на чале новай дзяржавы апынуўся Аляксандр Лукашэнка – “моцная рука”, як лічыць частка насельнікаў Расеі. Яны сімпатызуюць кіраўніку Беларусі, які звальняе чыноўнікаў за “обос..ных кароваў”, або вяртае на працу настаўніцу, звольненую за мацюкі на адрас сваіх вучняў. Але ў каментарах згадваецца і беспадстаўна жорсткае стаўленне да любых праяваў іншадумства.
Што крыўдзіць аўтараў каментароў – дык гэта варожая рыторыка, скіраваная супраць Расеі ў цэлым. У якасці контраргументаў гучаць заўвагі пра тое, што беларусы масава едуць у “ненавісную Расею” на працу, якая ратуе іхныя сем’і ад нішчымніцы.
Вядома, не абышлося ў каментарах і без звыклых ужо рытарычных заўваг, кшталту “яны хочуць новага Майдану”, абвінавачанняў і абразаў у бок Еўразвязу, заклёнаў “мы адзіны народ, у нас аднолькавы ген”.
Зрэшты, удзельнікі дыскусіі самі заўважылі, што ў аўтараў самых праімперскіх і самых варожых да Еўропы, Украіны і пратэстнай Беларусі каментароў – закрытыя профілі “Вконтакте”, дзе няма ні рэальных фотаздымкаў, ні іншай асабістай інфармацыі. І прыгадалі, што кошт падобных выказванняў – 15 рублёў.
________________________________________________________________
“Рэадоўка” – гэта мясцовая назва Рэадоўскага парку ў Смаленску, папулярнага месца адпачынку гараджан. Такую ж назву ўзяў сабе мясцовы навінавы партал Readovka.ru, які да нядаўняга часу асвятляў падзеі на Смаленшчыне, але з траўня гэтага году адмовіўся ад выключна рэгіянальнай тэматыкі, публікуючы навіны з усёй федэральнай акругі. Удзельнікі аднайменнай групы “Вконтакте” – гэта пераважна жыхары Смаленску, бліжэйшага да Беларусі расейскага абласнога цэнтру. Аднак відавочна, што ў дыскусіі пра акцыі пратэсту супраць інтэграцыі бралі ўдзел і насельнікі іншых расейскіх гарадоў. Таму можна казаць, што ідэя беларуска-расейскай інтэграцыі выклікае сумневы ў мэтазгоднасці ў даволі шырокіх колах насельніцтва Расейскай Федэрацыі.
Генрых Сухадольскі для Беларускага Радыё Рацыя
Глядзіце таксама
