Прызначаны новы пасол Латвіі ў Беларусі
Новым паслом Латвіі ў Беларусі прызначаны 61-гадовы Эйнарс Семаніс, паведамілі ў прэс-службе латвійскага МЗС.
1 жніўня прэзідэнт Латвіі Эгілс Левітс уручыў яму даверчыя граматы.
Працу ў Міністэрстве замежных спраў Семаніс пачаў у 1993 годзе як кіраўнік аддзела Амерыкі і Аўстраліі, займаў шэраг пасад кіраўнікоў, а таксама працаваў дарадцам у пасольстве Латвіі ў Кітаі і ЗША.
Семаніс быў надзвычайным і паўнамоцным паслом Латвіі ў Кітаі, Фінляндыі, Польшчы, паслом-нерэзідэнтам у Румыніі, Балгарыі, пры Святым прастоле і пры Суверэнным ваенным ордэне рыцараў-гаспітальераў святога Яна, Ерусаліма, Родаса і Мальты. З 2015 года Семаніс узначальваў пасольства Латвіі ў Літве.
Вучыўся Семаніс у Латвійскім універсітэце, дзе атрымаў ступень магістра па філасофіі і сацыялогіі. У Маскоўскім дзяржаўным універсітэце атрымаў ступень доктара філасофіі. Вучыўся таксама ва Універсітэце Осла і Лонданскай школе эканомікі і палітычных навук. Валодае англійскай, рускай і кітайскай мовамі.
Дата прыбыцця дыпламата ў Менск пакуль невядомая.
З 2015 года пасольства Латвіі ў Беларусі ўзначальваў Марціньш Вірсіс.
Глядзіце таксама
