Пучдэмон дапусціў вырашэнне крызісу без адлучэння ад Іспаніі
Экс-кіраўнік Каталоніі Карлес Пучдэмон дапусціў, што пры пэўных абставінах ад незалежнасці рэгіёна ад цэнтральных уладаў у Мадрыдзе можна адмовіцца. Пра гэта ён заявіў у інтэрв’ю, якое было апублікавана ў панядзелак увечары ў нямецкай газеце Die Welt.
„Я быў гатовы і застаюся гатовы да таго, каб прызнаць і іншы від адносін з Іспаніяй”, – сказаў ён, адказваючы на пытанне, ці ёсць альтэрнатыва патрабаванням аб незалежнасці. Паводле яго слоў, альтэрнатыўнае развіццё падзей „абсалютна магчыма”. „Я заўсёды выступаю за адзінства. Аднак прычына ўсяго крыецца ў ануляванні статусу аўтаноміі ад 2010 года, які быў узгоднены парламентамі Іспаніі і Каталоніі”, – заявіў ён.
Пучдэмон сышоў ад адказу на пытанне, ці будзе ён удзельнічаць у выбарах у Каталоніі 21 снежня, якія былі прызначаныя іспанскімі ўладамі. „Я стану кандыдатам толькі ў тым выпадку, калі ў нашых шэрагах будзе моцная кааліцыя, і толькі з той мэтай, каб блакаваць прымяненне 155-га артыкулу канстытуцыі, а таксама нівеліраваць нанесеную іспанскай дзяржавай шкоду”, – адзначыў экс-кіраўнік каталонскіх уладаў.
27 кастрычніка парламент Каталоніі па выніках рэферэндуму зацвердзіў рэзалюцыю аб абвяшчэнні незалежнай рэспублікі, гэты дакумент 8 лістапада прызнаны несапраўдным Канстытуцыйным судом краіны. Пучдэмон цяпер знаходзіцца ў Бельгіі, Іспанія патрабуе яго дэпартацыі.
Глядзіце таксама
