Рада БНР: Вучэнні „Захад-2017” наносяць вялікую шкоду Беларусі
Беларуска-расейскія вайсковыя вучэнні „Захад-2017”, якія распачаліся 14 верасня, наносяць вялікую палітычную шкоду Беларусі і шкоду яе рэпутацыі перад міжнароднай супольнасцю. З такой заявай выступіла Рада БНР.
Рада Беларускай Народнай Рэспублікі называе сябе беларускім урадам у выгнанні, „найвышэйшай установай і адзіным праўным прадстаўніцтвам суверэнных правоў беларускага народа‚ выяўленых у праватворчым Акце 25 сакавіка 1918 года‚ зафіксаваным Трэцяй устаўной граматай БНР”. Рада БНР працуе ў краінах, дзе ёсць яе прадстаўнікі: у ЗША, Канадзе, Вялікабрытаніі і інш.
У заяве, апублікаванай на сайце Рады БНР, адзначаецца, што вучэнні „Захад-2017” „адбываюцца на фоне анексіі Масквой Крыма, вайны ва Украіне і Сірыі, кібератакаў на дэмакратычныя інстытуцыі Захаду”.
„Рада БНР далучаецца да засцярогаў, якія выказваюць дэмакратычная супольнасць Беларусі і некаторыя міжнародныя назіральнікі датычна таго, што, нягледзячы на заявы прадстаўнікоў міністэрства абароны Беларусі, асобныя фармаванні расійскіх войскаў могуць застацца на тэрыторыі Беларусі пасля заканчэння вучэнняў”, — гаворыцца ў заяве.
„Рада БНР падкрэслівае, што гэта сталася б новым фактарам небяспекі не толькі для Беларусі, але і для іншых краінаў Еўропы — Латвіі, Літоўскай Рэспублікі, Польшчы. Асаблівую пагрозу гэта будзе несці для Украіны, паколькі расійскія сухапутныя часткі ў гэтым выпадку маглі б нанесці ўдар па яе паўночных і заходніх рэгіёнах”, — адзначаецца ў дакуменце.
Выхад расійскіх часцей з тэрыторыі Беларусі „павінен адбыцца не пазней чым 30 верасня, як пра гэта заяўлена афіцыйным Менскам”. „У супрацьлеглым выпадку кожны дадатковы дзень знаходжання расійскіх вайсковых частак і расійскай тэхнікі павінен разглядацца як акупацыя Беларусі”, — падкрэслівае Рада БНР.
У заяве таксама адзначаецца, што „беларускі народ не мае дачынення да сумнеўнага вайсковага альянсу паміж аўтарытарнымі рэжымамі Беларусі і Расеі”, таму што „ў Беларусі ніколі не было дэмакратычнага рэферэндуму, падчас якога б народ выказаўся за вайсковы саюз з Расеяй”.
Рада БНР заклікае ЗША, Вялікабрытанію і Францыю „ў выпадку неабходнасці выканаць свае абавязкі ў справе гарантыі беларускага суверэнітэту, дадзеныя ў адпаведнасці з Будапешцкім мемарандумам узамен на вывад ядзернай зброі з тэрыторыі Беларусі”.
Аўтары заявы таксама заклікаюць „беларускае грамадства і беларускіх патрыётаў у шэрагах збройных сілаў Рэспублікі Беларусь быць гатовымі да абароны незалежнасці Беларусі ад любой вонкавай пагрозы”. БелаПАН
