Расейцы атакавалі Адэскую вобласць
Уначы расейскія вайскоўцы атакавалі звышгукавымі супрацькарабельнымі ракетамі тыпу «Онікс» Адэскую вобласць.
Зафіксаваныя трапленні ў будынак пансіянату і збожжасховішчы, пашкоджаныя дамы. Пра гэта паведамілі Сілы абароны поўдня і кіраўнік абласной вайсковай адміністрацыі Алег Кіпер. Ракеты выпусцілі з берагавога ракетнага комплексу Бастыён у часова акупаваным Крыме.
Паводле кіраўніка вобласці, раненні ад аскепкаў шкла атрымалі чатыры чалавекі, ім надалі неабходную дапамогу.
У Палтаўскай абласной вайсковай адміністрацыі пацвердзілі выбух у Міргарадскім раёне падчас паветранай трывогі ў ноч на 7 кастрычніка. Папярэдне без пацярпелых.
Тым часам, у выніку абстрэлу пасёлка Уразава Валуйскай гарадской акругі Белгарадскай вобласці Расеі загінуў мужчына, паведамляе кіраўнік рэгіёну Вячаслаў Гладкоў. Гладкоў сцвярджае, што пасёлак атакавалі Узброеныя сілы Украіны з рэактыўнае сістэмы залпавага агню «Град». Паводле яго, пашкоджаныя 14 дамоў, адзін сацыяльны аб’ект і аўтамабіль. Таксама разбураныя гаспадарчая пабудова і склад.
Раніцай над Маскоўскай вобласцю знішчылі дрон, заявілі Мінабароны Расеі і мэр Масквы Сяргей Сабянін. Папярэдне, на месцы падзення абломкаў разбурэнняў і пацярпелых няма.
Беларускае Радыё Рацыя
