Расея і Беларусь накіравалі назіральнікаў на вучэнні НАТА
Расея і Беларусь накіравалі сваіх назіральнікаў на вучэнні НАТА Trident Juncture 2018 („Адзіны трызубец 2018”), заявіў генеральны сакратар Паўночнаатлантычнага альянсу Енс Столтэнберг 24 кастрычніка ў Бруселі на прэс-канферэнцыі перад пачаткам асноўнай палявой фазы вучэнняў у Нарвегіі.
Паўночнаатлантычны альянс вітае гэта, падкрэсліў Столтэнберг. „Мы запрасілі назіральнікаў усіх зацікаўленых краін, і мы вітаем той факт, што Расія і Беларусь прынялі гэта запрашэнне. Для краін НАТА вельмі важна заставацца транспарэнтнымі і прадказальнымі, таму мы запрасілі Расею назіраць за вучэннямі, выконваючы нашы абавязацельствы па Венскім дакуменце АБСЕ„, — цытуе яго ТАСС.
Столтэнберг падкрэсліў, што раней на пасяджэнні савета Расея — НАТА бакі правялі ўзаемныя брыфінгі па вучэннях Trident Juncture 2018 і „Усход 2018” (прайшлі ў верасні ў Расеі).
Ён таксама выказаў упэўненасць, што расійскія вайскоўцы будуць маніторыць вучэнні з караблёў і самалётаў, знаходзячыся ў непасрэднай блізкасці ад зоны манеўраў. „Я чакаю, што рускія будуць там, на поўначы, і калі яны будуць дзейнічаць прафесійна, пазбягаючы небяспечных збліжэнняў і іншых сітуацый, я не лічу, што іх прысутнасць можа быць праблемай”, — сказаў Столтэнберг. БелаПАН
