“Нармандская чацвёрка” абмеркавала рэжым спынення агню (абноўлена)
15 лютага вечарам адбылася тэлефонная размова паміж лідарамі краін «нармандскай чацвёркі» – Расеі, Германіі, Францыі і Украіны. Уладзімір Пуцін, Ангела Меркель, Франсуа Аланд і Пётр Парашэнка канстатавалі захаванне рэжыму спынення агню на Украіне, нягледзячы на лакальныя інцыдэнты.
«Кіраўнікі дзяржаў разгледзелі эфектыўнасць рэжыму спынення агню. Яны канстатавалі, што рэжым спынення агню ў цэлым выконваецца, нягледзячы на шэраг лакальных інцыдэнтаў, якія былі аператыўна ўрэгуляваны », – цытуе РІА Навіны вытрымкі з камюніке Елісейскага палаца.
* * *
Сёння лідары Францыі, Нямеччыны, Украіны і Расеі абмяркуюць выкананне рэжыму спынення агню. Абмеркаванне пройдзе ў час тэлефоннай размовы. Напярэдадні адбыліся дзве тэлефонныя размовы: адну правялі Уладзімір Пуцін, Ангела Меркель і Франсуа Аланд, а другую – Аланд, Меркель і Пётр Парашэнка.
Праз тэлефон будуць размаўляць у “нармандскім фармаце” – гэта значыць усе лідары разам. Асаблівая ўвага надзяляецца сітуацыі вакол важнага транспартнага вузла Дэбальцава, дзе апошнімі днямі адбываліся жорсткія баі.
Беларускае Радыё Рацыя
Фота REUTERS
Глядзіце таксама
