„Шэнген” будзе каштаваць беларусам 35 еўра праз два месяцы
Цана „шэнгена” для беларусаў знізіцца да 35 еўра праз два месяцы пасля заключэння паміж Беларуссю і Еўрасаюзам пагадненняў аб спрашчэнні візавага рэжыму і рэадмісіі. Аб гэтым у эфіры тэлеканала АНТ расказаў кіраўнік прадстаўніцтва Еўразвяза ў Беларусі Дзірк Шубель.
Адказваючы на пытанне аб тым, калі шэнгенская віза стане для беларусаў таннейшай, Дзірк Шубель падкрэсліў, што канкрэтную дату пакуль назваць немагчыма. „З уступленнем у сілу абодвух пагадненняў, візавы збор знізіцца з цяперашніх 60 еўра да 35 еўра. Я не хацеў бы называць канкрэтную дату, але запэўніваю, што мы працуем над тым, каб гэта адбылося”, – сказаў ён.
Закрануў кіраўнік прадстаўніцтва ЕЗ у Беларусі і рэгіянальнае супрацоўніцтва: „Перш за ўсё мы працуем з усімі краінамі „Усходняга партнёрства” ў рамках Канферэнцыі рэгіянальных і мясцовых органаў улады. Калі не памыляюся, у 2020 годзе Беларусь будзе сустаршынёй гэтай платформы. На мой погляд, гэта сведчыць аб тым, што Беларусь актыўна ўдзельнічае ў рабоце канферэнцыі, што мы, безумоўна, вітаем. Адначасова ЕЗ і Беларусь на працягу шэрага гадоў інтэнсіўна супрацоўнічаюць у сферы рэгіянальнага і мясцовага развіцця, рэалізуюць праграмы і, што не менш важна, развіваюць трансгранічнае супрацоўніцтва”.
„Прытрымліваюся таго ж падыходу, што і мая папярэдніца (экс-кіраўнік прадстаўніцтва ЕЗ у Беларусі Андрэа Віктарын. – Заўвага БЕЛТА) – я настроены на адкрытасць. Мая мэта – і далей актывізаваць адносіны з Рэспублікай Беларусь. На мой погляд, мы прайшлі вялікі шлях за апошнія пяць гадоў, калі параўноўваць з тым, што было. Упершыню я прыехаў сюды ў камандзіроўку ў 2006 годзе. І цяпер не пазнаю гэту краіну, не пазнаю дзяржслужачых. Таму што цяпер адносіны больш адкрытыя, што я вельмі цаню і з вялікім аптымізмам гляджу на тое, чаго мы можам дасягнуць разам”, – сказаў Дзірк Шубель.
„Мы таксама садзейнічаем падрыхтоўцы да ўступлення Беларусі ў Сусветную гандлёвую арганізацыю”, – заўважыў Дзірк Шубель. Паводле яго слоў, гэты важны крок „дапамог бы ў будучым прыйсці да таго, на што мы ўсе спадзяёмся: да пачатку перагавораў аб заключэнні рамачнага пагаднення паміж нашымі бакамі”.
Як паведамлялася, Беларусь завяршыла ўнутрыдзяржаўныя працэдуры па пагадненні з Еўрапейскім саюзам аб спрашчэнні візавага рэжыму і рэадмісіі. Кіраўніком дзяржавы Аляксандрам Лукашэнкам прынята рашэнне аб падпісанні гэтых дакументаў. Гэтаму кроку папярэднічаў даволі складаны і доўгі па часе перагаворны працэс з Еўрапейскім саюзам, па выніках якога выпрацаваны ўзаемапрымальныя тэксты, якія ў найбольш поўнай меры ўлічваюць інтарэсы абодвух бакоў. Цяпер чакаецца сігнал ад еўрапейскіх партнёраў аб завяршэнні неабходных працэдур з іх боку, пасля чаго будуць вызначаны канкрэтныя мадальнасці падпісання.
Пагадненне аб спрашчэнні візавага рэжыму паміж Беларуссю і ЕЗ прадугледжвае зніжэнне кошту „шэнгена” з 60 да 35 еўра і прыняцце рашэння аб выдачы візы ў тэрмін да 10 дзён (у выпадку дадатковай праверкі тэрмін можа павялічыцца да 30 дзён).
