Святлана Ціханоўская аб’явіла народны ультыматум Лукашэнку
«Два месяцы таму мы прачнуліся, як у звычайны выходны дзень, і паехалі галасаваць. І мы ўсе прагаласавалі за перамены. Два месяцы таму быў наш апошні звычайны выходны. Мы выйшлі на вуліцы, каб вярнуць свае галасы, і атрымалі за гэта кулі, дубінкі, турэмныя камеры і цынічную хлусню рэжыму. Яны пытаюцца нас падчас удараў: «Вы хацелі пераменаў?» Яны кажуць нам: «Вось вам перамены», — гаворыцца ў паведамленні штабу Ціханоўскай.
«Мы адкажам: гэта — не перамены. Вы саджалі нас заўсёды, а цяпер сталі саджаць яшчэ больш. Вы запалохвалі нас заўсёды, а цяпер сталі запалохваць яшчэ больш. Вы заўсёды білі мужчын, а цяпер б’яце яшчэ жанчын, дзяцей і старых. Не спрабуйце выдаваць гэта за дыялог. Гэта дзяржаўны тэрор. І кожны, хто яшчэ не прыняў рашэнне перайсці на бок народа — саўдзельнік тэрору. Заявіце публічна аб тым, што больш не падтрымліваеце рэжым. Звярніцеся да нас праз фонды, лісты ці нават знаёмых. Калі вы не зробіце гэтага-значыць гэта вашымі рукамі зараз збіваюць нашых бабуль і дзядуляў. Гэта з-за вас ім учора пагражалі зброяй — магчыма, упершыню з іх страшнага ваеннага дзяцінства», — адзначаецца ў паведамленні.
«Мы шмат разоў казалі, што гатовыя да дыялогу і перамоваў. Але размова за кратамі-гэта не дыялог. Збіваць свой народ пасля заяў аб гатоўнасці да перамоваў-не дыялог. Лукашэнка забівае сваю будучыню і спрабуе пацягнуць за сабой чыноўнікаў, сілавікоў і ўвесь беларускі народ. Але мы гэтага не дапусцім. Прайшло два месяцы палітычнага крызісу, гвалту і беззаконня — і з нас хопіць. 25 кастрычніка мы аб’яўляем Народны ультыматум.
У рэжыму ёсць 13 дзён, каб выканаць тры абавязковыя патрабаванні:
1. Лукашэнка павінен абвясціць аб сыходзе.
2. Гвалт на вуліцах павінна спыніцца цалкам.
3. Усе палітвязні павінны быць вызваленыя.
Калі да 25 кастрычніка нашы патрабаванні не будуць выкананыя, уся краіна мірна выйдзе на вуліцы з Народным ультыматумам. І 26 кастрычніка пачнецца нацыянальная забастоўка ўсіх прадпрыемстваў, блакаванне ўсіх дарог, абвал продажаў у дзяржаўных крамах. У вас ёсць 13 дзён, каб выканаць тры ўмовы. У нас ёсць 13 дзён, каб падрыхтавацца і ўвесь гэты час беларусы будуць працягваць свой мірны і настойлівы пратэст.
Вы спрабуеце паралізаваць жыццё нашай краіны, не разумеючы, што Беларусь — гэта больш, чым рэжым. Беларусь — гэта мацней, чым рэжым. Раз вы чакалі загаду — то вось загад. І тэрмін яго выканання — да 25 кастрычніка».
