Сямашка абмеркаваў з паслом Літвы адкрыццё межаў
Адкрыццё межаў для перамяшчэння грамадзян, будаўніцтва БелАЭС і іншыя тэмы абмеркавалі сёння, 12 чэрвеня, пасол Беларусі ў Расеі Уладзімір Сямашка і новапрызначаны пасол Літвы ў РФ Эйтвідас Баярунас.
Уладзімір Сямашка
Размова ў рэжыме відэаканферэнцыі адбылася па ініцыятыве літоўскага боку, паведамілі БЕЛТА ў прэс-службе беларускай дыпмісіі.
«Абмеркавана эпідэміялагічная сітуацыя з COVID-19 у Беларусі, Літве і краінах-суседзях, а таксама звязаныя з гэтым пытанні адкрыцця граніц для перамяшчэння грамадзян», – адзначылі ў пасольстве.
Адбыўся абмен думкамі па актуальных пытаннях двухбаковага парадку дня. Субяседнікі падкрэслілі зацікаўленасць у нарошчванні ўзаемнага гандлю, актывізацыі інвестыцыйнага і гандлёва-эканамічнага супрацоўніцтва. У гэтым кантэксце Уладзімір Сямашка звярнуў увагу літоўскага калегі на перавагі вядзення бізнесу ў Беларусі, у прыватнасці на тэрыторыі свабодных эканамічных зон, а таксама Кітайска-беларускага індустрыяльнага парка «Вялікі камень», які з’яўляецца ўнікальнай прасторай з максімальна спрыяльным інвестыцыйным кліматам.
«Пры абмеркаванні будаўніцтва БелАЭС беларускім бокам даведзена разгорнутая аргументацыя аб безумоўнай важнасці станцыі для гарантавання энергетычнай бяспекі нашай краіны, а таксама аб прымяненні пры ўзвядзенні абʼекта самых высокіх стандартаў ядзернай бяспекі, прызнаных на міжнародным узроўні, – падкрэслілі ў прэс-службе. – Бакі сышліся на думцы аб існуючым вялікім патэнцыяле для ўзаемадзеяння ў сферах культуры, адукацыі, навукі, беручы пад увагу гістарычную і культурную агульнасць беларускага і літоўскага народаў».
Уладзімір Сямашка і Эйтвідас Баярунас выказалі ўзаемную цікавасць да прадаўжэння кантактаў на розных узроўнях па лініі дыпмісій Беларусі і Літвы ў Расеі.
Глядзіце таксама
