The Times: Расейскія войскі ваююць у Сірыі на баку Асада
Расея накіроўвае вайскоўцаў і зброю ў Сірыю для абароны рэжыму Башара Асада.
Пра гэта піша брытанская The Times.
Паводле інфармацыі выдання, троххвілінны відэасюжэт паказвае, як сірыйскае войска прыкрывае цяжкая бранетэхніка, прынамсі, найноўшы БТР-82А, якія ёсць на ўзбраенні толькі ў войску Расеі. Пры гэтым на відэа выразна гучыць расейская мова.
[youtube id=”IK0m9a6JJ80″]
На відэа чуваць расейскую мову з 2:03.
У сваю чаргу, амерыканская The Washington Post піша, што нядаўнія паведамленні з адкрытых крыніц і выявы расейскага абсталявання ў Сірыі пацвярджаюць тое, што Крэмль паступова нарошчвае прысутнасць у гэтай ахопленай вайной краіне для падтрымкі рэжыму сірыйскага прэзідэнта Башара Асада.
Расейскі БТР-82А
У аўторак, 1 верасня, філіял „Аль-Каіды” ў Сірыі „Фронт аль-Нусра” апублікаваў чатыры фатаздымкі, на якіх бачны знішчальнік, які нагадвае расейскі Су-34, і беспілотнік вытворчасці РФ, якія былі заўважаныя ў сірыйскай правінцыі Ідліб.
Гэтая інфармацыя паступіла праз два дні пасля таго як ізраільская газета YNET паведаміла пра прыбыццё ў Сірыю расейскіх ВПС і пілотаў „у бліжэйшы час” для нанясення авіяўдараў па баевіках ІДІЛ і сірыйскіх паўстанцах якія пагражаюць рэжыму Асада.
Расейскі беспілотнік
Самалёт, падобны да СУ-34
Самалёт, падобны да СУ-34
У адрозненне ад знішчальнікаў РФ, дроны расейскай вытворчасці часта назіраліся цягам чатырохгадовага вайсковага канфлікту ў Сірыі.
„Прысутнасць расейскіх самалётаў у небе над Сірыяй, дзе Злучаныя Штаты і сілы кааліцыі вядуць паветраную кампанію са жніўня мінулага года, можа зрабіць кіраванне паветранай прасторай яшчэ больш складанай задачай, чым яна ёсць”, – адзначае выданне.
Раней прэзідэнт Сірыі Башар Аль-Асад заявіў, што ён упэўнены ў тым, што не страціць сталую падтрымку ключавых хаўруснікаў – Ірана і Расеі.
