Ціханоўская наведае з рабочым візітам Грэцыю
12-14 траўня Святлана Ціханоўская наведае з рабочым візітам Грэцыю па запрашэнні міністра замежных спраў краіны, паведамляе тэлеграм-канал Ціханоўскай.
Беларуская лідарка правядзе сустрэчы з урадам, парламентам, мэрам Афінаў, а таксама выступіць на Дэльфійскім эканамічным форуме, які праходзіць у Афінах. Там плануюцца сустрэчы з прадстаўнікамі дзяржаў Паўднёвай і Паўднёва-Усходняй Еўропы.
Ключавая мэта візіту Ціханоўскай – мабілізацыя палітычнай падтрымкі ў краінах, дзе да беларускага крызісу менш увагі. Святлана Ціханоўская едзе са спісам прапаноў, як Грэцыя і краіны рэгіёну могуць дапамагчы беларускай грамадзянскай супольнасці і СМІ.
На Дэльфійскім эканамічным форуме Ціханоўская будзе казаць пра бачанне будучыні для Беларусі, а таксама як Еўропа можа дапамагчы ў нашай барацьбе. Асобна будзе ўзнятае пытанне палітвязняў і бесчалавечнага ўтрымання іх у турмах.
У канцы мінулага тыдня Святлана Ціханоўская вярнулася з рабочых візітаў у Аўстрыю, Італію і Славенію.
