Ціханоўская сустрэлася з прэзідэнтам Аўстрыі і беларускай дыяспарай у Вене (абноўлена)
Святлана Ціханоўская знаходзіцца з рабочым візітам у Аўстрыі.
Сёння яна сустрэлася з прэзідэнтам Аўстрыі Аляксандрам Ван дэр Белленам, а таксама
– сустрэлася з беларускай дыяспарай у Вене;
– выступіла ў парламенце Аўстрыі і дыпламатычнай акадэміі Вены;
– пагутарыла з лідарамі дэпутацкіх фракцый Аўстрыі і распавяла пра катаванні ў беларускіх турмах: людзей трымаюць у нечалавечых умовах, заліваюць падлогу хлоркай, каб зняволеныя не маглі дыхаць, распранаюць дагала і прымушаюць спаць на бетоннай падлозе або металічных дубцах;
– заклікала аўстрыйскіх дэпутатаў падтрымаць міжнародную кампанію супраць катаванняў і за вызваленне зняволеных па палітычных матывах у Беларусі;
– распавяла пра сітуацыю з каронавірусам у Беларусі. Беларускія медыкі просяць СААЗ і міжнародную грамадскасць правесці рэальнае расследаванне пра фальсіфікацыі статыстыкі па Covid-19 у Беларусі;
– Ціханоўская падкрэсліла, што Аўстрыя можа адыграць важную ролю ў гісторыі Беларусі ў якасці пасярэдніка падчас перамоў: «Рэжым ужо аслаблены, і Аўстрыя можа дапамагчы ўзмацніць ціск для паскарэння старту перамоваў”, – заявіла беларуская дэмакратычная лідарка.
* * *
Святлана Ціханоўская знаходзіцца з рабочым візітам у Аўстрыі. Сёння яна сустрэлася з прэзідэнтам Аўстрыі Аляксандрам Ван дэр Белленам, паведамляе тэлеграм-канал Ціханоўскай.
Падчас сустрэчы Ціханоўская і Ван дэр Беллен:
– абмеркавалі эскалацыю рэпрэсіяў і раскол у элітах Беларусі, сітуацыю з палітвязнямі. Святлана Ціханоўская распавяла пра тое, што ў гадавіну Чарнобыльскай трагедыі сілавікі не давалі запаліць лампады каля храмаў у памяць пра ахвяраў катастрофы;
– абмеркавалі падтрымку Аўстрыяй закліку Ціханоўскай да мірнага ўрэгулявання крызісу ў Беларусі праз перамовы, якія прывядуць да свабодных прэзідэнцкіх выбараў у гэтым годзе. Аўстрыя разам з АБСЕ гатовая шукаць шляхі дапамогі ў арганізацыі дыялогу з рэжымам;
– казалі пра важнасць захавання суверэнітэту і незалежнасці Беларусі, пра ўмацаванне нацыянальнай ідэнтычнасці і ўстойлівасці беларускага грамадства;
– ўзнялі пытанне пра сітуацыю з COVID-19 у Беларусі і спробах рэжыму схаваць рэальную статыстыку па захворванні.
Фота: t.me/tsikhanouskaya
