Ціханоўская запісала зварот да беларусаў з нагоды гадавіны Слуцкага збройнага чыну
27 лістапада – гадавіна Слуцкага збройнага чыну. І ў савецкія часы, і зараз, гэтая частка нашай гісторыі замоўчваецца ці ад яе ўвогуле адмаўляюцца.
З гэтай нагоды дэмакратычная лідарка Святлана Ціханоўская запісала зварот, у якім нагадала пра падзеі таго часу.
“У 1920 годзе беларусы больш за месяц змагаліся за свабоду і права жыць у вольнай краіне. Сяляне ды інтэлігенцыя стаялі плячо да пляча і баранілі незалежную Беларускую Народную Рэспубліку. Яны імкнуліся захаваць нашу краіну непадзельнай – і спыніць агрэсію з боку краіны-суседкі”, – кажа лідарка.
– Беларусы змагаліся за саму ідэю існавання краіны і ахвяравалі жыццём, каб іх дзяцей і ўнукаў не паглынула імперская багна. І сёння Беларусі зноў пагражае паглынанне. Як і сто гадоў таму, Расея насаджае ўласныя ідэі і каштоўнасці, каб знішчыць нашае права на самавызначэнне. Але мы не маем права саступіць у гэтай барацьбе.
“Беларусы, бараніце родную культуру, мову, гісторыю. Гэта і будзе нашым сучасным супрацівам імперскаму “рускаму свету”, – такімі словамі Святлана Ціханоўская завяршыла свой зварот.
Беларускае Радыё Рацыя
