У Ерэване паліцыя разагнала дэманстрантаў
Увечары 20 ліпеня адбыліся сутыкненні паміж паліцыяй і дэманстрантамі, якіх было некалькі соцень. Як паведамляе міністэрства аховы здароўя Арменіі, у выніку сутыкненняў пацярпелі каля 20 грамадзянскіх асобаў і 25 паліцэйскіх.
У армянскай сталіцы адбываліся сутыкненні паміж паліцыяй і сотнямі дэманстрантаў, якія сімпатызуюць узброенай апазіцыйнай групе, што ўжо некалькі дзён трымае закладнікаў у адным з паліцэйскіх пастарункаў.
Сутыкненні пачаліся пасля таго, як патрабаванні дэманстрантаў забяспечыць харчаваннем узброеную групу засталіся без увагі з боку ўладаў.
Дэманстранты закідалі кардон паліцэйскага спецназу камянямі, пасля чаго паліцыя ўжыла светашумавую зброю, каб разагнаць натоўп.
Узброеная група захапіла паліцэйскі ўчастак Эрэбуні на досвітку 17 ліпеня, забіўшы аднаго супрацоўніка міліцыі і параніўшы яшчэ шэсьць чалавек.
[youtube id=”mwAbX3syJoE”]
Захопнікі працягваюць утрымліваць чатырох супрацоўнікаў паліцыі ў закладніках. Яны патрабуюць вызвалення Жырайра Сэфіляна, лідара апазіцыйнага руху „Устаноўчы парламент”, які быў арыштаваны ў мінулым месяцы паводле абвінавачвання ў незаконным набыцці і захоўванні зброі. Яны таксама патрабуюць ад прэзідэнта Сержа Саргсяна сысці ў адстаўку.
Улады адхілілі патрабаваньні групы і кажуць, што пераконваюць баевікоў здацца.
