У Гародні зарэгістравалі кандыдатаў у дэпутаты
Акруговыя выбарчыя камісіі Гародні, а іх чатыры, зарэгістравалі кандыдатаў у дэпутаты Палаты прадстаўнікоў. Толькі ў 49-й акрузе зарэгістраваныя ўсе заяўнікі: сем. Сярод іх ад палітычных партыяў: ад партыі БНФ, Аб’яднанай грамадзянскай партыі, Партыі левых „Справядлівы Свет”, Ліберальна-дэмакратычнай партыі. Астатнія трое – ад дзяржаўных установаў.
Кажа назіральнік па акрузе №49 Раман Юргель:
– Зарэгістравалі таксама кандыдатам у дэпутаты начальніка ўпраўлення арганізацыйна-кадравай работы Гарадзенскага аблвыканкама Сяргея Пацэвіча. Ён ішоў шляхам збору подпісаў і таксама ад працоўнага калектыву ЖРЭП Кастрычніцкага раёна Гародні. За яго ініцыятыўнай групай было сабрана 1936 подпісаў, і ўсяго 5 подпісаў прызнана нядзейснымі.
У іншых акругах былі выпадкі нерэгістрацыі заяўнікаў па розных прычынах. У акрузе №50 не зарэгістравалі трох, у №51 – двух, а ў №52 – чатырох. Ужо ўвечары кандыдаты ў дэпутаты па Гародні атрымаюць кандыдацкія пасьведчаньні і сфармуюць спіс давераных асобаў да 15 чалавек.
Якуб Сушчынскі, Беларускае Радыё Рацыя, Гародня
Фота sb.by
